Auleria Wakudumo 

Namibia oku li ta unganeke oudano wocricket wovadani ovo ve li koshi yeedula 19. Eshi oshi li oshikando shotete oshilongo tashi danenwa oudano woludi la tya ngaha mounyuni. 

Minista wehongo, oungoba, omaudano novanyasha Sanet Steenkamp okwa patulula pambelewa oudano ou nokutambula ko ovaenda okudja keembinga adishe dounyuni. 

Pefimbo ta patulula oudano wocricket pambelewa, minista okwa holola kutya oshilongo oshi udite etumba eshi oudano woludi la tya ngaha tau danenwa moNamibia. 

Minista okwa ti onhanda youdano wocricket kau shi ashike okukufa ombinga. 

“Oudano ou kau shi ashike okutondoka nokuvena, ndele otau yandja omhito kovanyasha okukwatafana novadani vakwao okudja kondje yoilongo,” Minista ta holola ngaho. 

Oudano wocricket owa hovela onghela nowa teelelwa u ka kale we ya pexulilo momafiku 26 Januali 2026. Oudano otau ka hovela alushe potundi 09h30. Poshivelo shokapale otapa futilwa. 

Oilongo ngaashi Australia, South Africa, Afghanistan, Japan, Ireland, Tanzania, Sri Lanka osho yo West Indies oya teelelwa i kale ya lyata medu liyamba nokukufa ombinga moudano ou. 

Minista okwa tambula ko oilongo ihetatu oyo tai ka kufa ombinga moudano ou, mwa kwatelwa: Australia, Sri Lanka, Ireland, Afghanistan, West Indies, Tanzania, South Africa naJapan. 

Steenkamp okwa twa ovakufimbinga omukumo opo va kufe ombinga nokukala ve udite owuumbo okukala moNamibia osho yo okudana oudano wombili. 

“Kaleni mu udite owuumbo moshilongo shetu. Kaleni mu na omhepo yefiyafanepo, oukaume nefimaneko moudano,” Steenkamp te va tu omukumo ngaho. 

Minista okwa udaneka ovakufimbinga vokondje yoilongo kutya oshilongo oshi na oihokiwa ihapu oyo tai va hokifwa pefimbo loule woudano wavo. Okwa ti imwe ovadani tava kala va hokwa ongaashi ouninginino wetango oo hau kala tau monika nawa neenghono. 

-awakudumo@nepc.com.na