Abraham Mwanyekange 

Ovalanduli komalungula vomufita wongeleka yoshiveva Simon Sheehama, e na ongeleka yoUnity Embassy Ministries moSwakopmund ova yandja omaliudo a yooloka shelikololela kekongo lahamushanga mongeleka omo. 

Sheehama okwa shanga tati ‘Ohandi kongo omukadona omunyashele a ninge hamushanga wongeleka, na kale omudalululwa yee nakale ihalongo, molwaashi otaka longa okudja pomuwoi wongula fiyo 18h00 komatango, Omaandaxa fiyo Osoondaxa. 

Omunailonga ou ota ka futwa ashike ofuto oN$1000 komwedi. Sheehama okwa shanga tati omukadona na kale eshi okupopya elaka lopambelewa yee na kale eli longekida okuya naye momalweendo oilonga yopangeleka. 

Okudja opo ovashikuli va Sheehama komalungula okwa li vena omaliudo a yooloka keindilo laye. 

Umwe okwa shanga tati, Kalunga naye okwa li hafuda po mefiku eti-7 koshivike. 

“omolwa shike omunhu e na okulonga Omaandaxa fiyo oshoondaha,”a pula. 

Vamwe ovafeekela omufita tava ti natye ashike ota kongo omukadona waye ponhele yahamushanga. 

Omanga vamwe ta vati 1000 oli li nawa kwaau ehenasha oilonga. 

Umwe okwa pula Sheehama ngeenge ota wanifa po ngaho oveta ina sha nofuto yovanailonga oyo ya tulwa po kepangelo yokomwedi eshi tati otafutu 1000 komwedi? 

Oveta ina sha neendjabi dovanailonga moNamibia ota iti omunailonga nafutwe ondjabi ngeenge oishona komwedi oN$3000 omanga movili nafutwe N$18. 

Sheehama okwa lombwela Kundana ta ti yee kena efiku a konge omukadona mongeleka molwaashi ngeenge okwa hala ota dulu okumona omukainhu keshe shaashi okushiivike nawa. Okwa weda ko tati hamushanga ou ta kongo ita kalonga efiku alishe. 

Okwa yelifa ta ti ovanhu naveli longe okupwilikina nawa. 

“Hamushanga ota kala ashike ta longo ngeenge pena omhumbwe unene tu ngeenge ndili mo Swakopmund,” ta ti. 

Okwa weda po ta ti nomalweendo ota imo ashike ngeenge tuna omaudifo kondje yaSwakopmund. 

Omufita okwati haye ashike omunailonga wotete taka kala e na oo. 

“Keumbo ondina ko nale umwe handidi naye, oimaliwa ei handi mupe yo N$1500 komwedi oheimbaanga ashike molwaashi oha ndi mu file oshisho ngeenge tashi ya poikulya noipumbiwa yefiku nefiku,” tati. 

Sheehama okwa ti oye umwe womwaavo tava shakeneke epangelo ondjilakati mokuetapo eemito doilonga moNamibia. 

Sheehama okwa ti okwa mona nale hamushanga oo eli omulihongi nokuwete kutya oshimaliwa otashi kavatela meemhumbwe daye dofikola. 

Omupopiliko waElcin moNamibia Thomas Uushona okwa lombwela Kundana ta ti oohamushanga momaongalo a Elcin ohava futwa ondjabi okudja N$ 3800 fiyo N$ 4500 shelikwatelela kodjapo yavo. 

Okwa weda po tati eendjabi odo ohadi talululwa keshe kodula. 

Okwa ti neudo opena okutulwa elandulafano lipe molwaashi olo likulu lomo 2022 ota lihuluko neudo. 

-abbenghilai@gmail.com