OSHIKUKU – MINISTA gwomayambulepo gwoondoolopa niitopolwa yokuushayi Erastus Uutoni okwa kumagidha oshigwana shi kale tashi kutha ombinga mooprogalama hadhi yambindhindha okutungila oshigwana omagumbo.
Ooproyeka ndhoka ongaashi Build Together, Shack Dwellers oshowo ndhoka hadhi longele kumwe nomalelo goondolopa.
Uutoni ndhoka okwa li e dhi popi esiku a li a gandja pambelewa omagumbo ge li 219 oshowo omahala mpoka tapu ka tungwa omagumbo ge li 30 koshigwana sha kutha ombinga moopyooyeka ndho Shack Dweller oshowo dhili 10 kaakuthimbinga moBuild Together kOshikuku.
“Uuministeli otau tsikile okuyambidhidha omalelo goondoolopa, nooproyeka tadhi tungile oshigwana omagumbo. Ngaashingeyi uuministeli owa longekidha oomiliona odhindhji, okuyambindhindha ooproyeka ndhoka, omolwiilonga iiwanawa tadhi longele oshigwana,’’ ta ti ngaaka.
Ta ti ngele ito kutha ombinga mooproyeka ndhoka mbali, to kala po, ngoye wu kale inoo mona olukalwa lwoye mwene lwa aluhe.
“Natango onda yelithilwa kutya elelo lyondoolopa lyOshikuku olya longekidha omahala oshowo oomilliona N$800 000 okutungila oshigwana omagumbo. Omagumbo ngoka otaga ka tungilwa mboka haya mono iiyemo yi li kohi yoshimaliwa N$6 000,” ta popi ngaaka.
Ta gwedha po ta ti, elelo lyOshikuku ota li longo nuundhiginini okugandja omalukalwa kaakalimo yamo.
Uutoni okwa kumagidha natango oshigwana shoka tashi ka pewa omahala gawo opo shi longe nuundhiginini okumana okutunga omagumbo gawo pethimbo.
“Otatu pandula ooproyeka ndhoka mbali, oshoka shoka tadhi longo, osha simana nosha lundulula oonkalamwenyo dhoyendji,”ta pendula ngaaka
Ngoloneya gwoshitopolwa shaMusati Erginus Endjala okwa li a holola euvonawa lye, sho komwaalu gwaantu yaana omagumbo kwa zi.
“Olukalwa oshinima sha simana, na kehe gumwe okwa pumbwa egumbo lye mwene. Onkalo yokambashu oya pumbwa okuhula, ihe shoka otashi ningwa ashike ngele tamu longo nuundhiginini,” ta popi ngaaka.
Ngoloneya okwa li wo a kumagidha aalumentu ya kale taya kongo omagumbo, oshoka okwa ndhindhilike ashike aakiintu oyo ashike taya longo nuundhiginini okukonga omalukalwa.
Mayola gwelelo lyondoolopa yaShikuku Julia Endjambi okwa ti, elalakano okuhumitha komeho nokuyambula po ondoolopa yaShikuku oshowo okulongela oshigwana uuwanawa, opo shi kale monkalo tayi hokitha.
“Otwa hala Oshikuku shi hume komeho sho shoka ta tu longo nuundhiginini, okuyambulapo ondoolopa ndjika,”ta yelitha ngaaka.
Ta ti, natango oyena ohokwe yoku gandja oopolota kaakwashigwana yayo.
Oshilyo sho proyeka yoShack Dweller, Johanna Amutenya okwa ti oopreyeka ndyoka oya longo nuundhiginini okuyambindhindha aakalimo yomoshikuku.
“Omagumbo gongushi yoomilliona N$8.5 ngoka ga li ga tungwa okupitila moproyeka yoShack Dweller oga pwa , no twa shunitha nale oomillina N$6.9,” ta fatulula ngaaka.
vkaapanda@nepc.com.na