Elelo laUkwanyama ola pula epangelo opo li yambidide ounafaalama moshilongo, koo ku ninipikwe eeto moshilongo loikulya tai di kondje yoilongo.
Elelo otali pula epangelo opo li yandjeneke oikunino noku yambidida ounamapya moshitukulwa shaHangwena.
Edi oda popiwa kelenga lakula melelo laUkwanyama loshikandjo shaEenhana Efraim Weyulu pefimbo va ya nomutumba novaleli vongudu tai pangele, mwa kwatelwa omupeduprima Netumbo Nandi-Ndaitwah noshoyo hamushangandjai wongudu yoSwapo Sophia Shaningwa.
Omutumba owa li ko mexuliloshivike kEenhana omo kwa li ovaleli tava kundafana kombinga yomhumbwe yomeva moshitukulwa shaHangwena noshoyo nghee omhumbwe yomeva i na okukandulwa po.
Weyulu okwa pula epangelo opo li yandjaneke ounala womeva moshitukulwa shaHangwena ngaashi naana moitukulwa ngaashi Omusati nOshana mu na ounaala womeva.
“Nafye otwa hala okulonga oikulya yetu vene opo tu dule okulwifa ondjala nonghalo yokuhe na oilonga movanyasha ve li mOhangwena,” Weyulu ta ti.
Onghee okwa ti itashi ulike efano liwa ngeenge ovanhu tava lande oikulya meefitola ya dja kondje yoshilongo omanga Ovanamibia navo ve na onhele yedu ya wana tai dulu okulongifwa okuninga oikunino.
Okwa yelifa ta ti ngeenge mOhangwena omu na oikunino ihapu younamapya ovanyasha otava ka mona eemhito doilonga.
“Ovanyasha ova ninga oihakanwa yokulonga oimbuluma ngaashi okuvaka po omaliko ovanhu molwaashi kave na oilonga,” ta ti.
Okwa weda po ta ti ounimisteli wounamapya nau kale tau eta po eepoloyeka dounamapya dihapu moitukulwa aishe molwaashi ounamapya owa fimana nohau yambula po eliko loshilongo.
Weyulu okwa ti Namibia okwa pumbwa okulihonga oshilongwa pefimbo lombuto yoCovid-19 eshi kwa li ashike ta xupu mokulanda oikulya koilongo ya yooloka yokondje.
Onghee okwa ti Namibia okwa pumbwa okukala ta landifa oiimati ya longwa kOvanamibia moikunino yavo opo eliko loshilongo li xume komesho. fhamalwa@nepc.com.na