Omupopiliko mombelewa i lile po elelo lopashitukulwa mOshikoto okwa ti ova didilika oikandjohoololo ya fika puitatu i na enota lamemememe, noya pumbwa evatelo lomeendelelo.
Petrus Nehale okwa ti elelo loshitukulwa ola didilika noli shi shi kutya oikandjohoololo ngaaashi Nehale lyaMpingana, Okankolo oshoyo Eengodi, oya dengwa neenghono kenota, omo nokuli ngaashi moshitukulwa shaNehale LyaMpingaana la twaalela omwenyo womunhu.
Okwa ti oshitukulwa pamwe nouministeli wounamapya, ova longela kumwe opo va dule okumona omaloli e na eetona da fika po10 domeva a dule okuvatela koitukulwa ei manga onghalo tai shuna kouwa.
“Oikandjohoololo aishe moshitukulwa ei ya taalela enonta lidjuu oya teelelika i kale ye lishangifa peembelewa dookansela moshitukulwa. Eshi otwe shininga opo tu dule okukeelela oiningwanima yovanhu tava wile meendugu shaashi tava kongo omeva, oo kwa pwinina a ya mokule,” Nehala ta yelifa. Okwa twikila kutya elelo loshitukulwa natango ola hala yoo okulombwela oshiwana kutya otali longo noudiidini okuongela oshimaliwa opo shi dule okutungila ovanhu vasho eepomba domeva.
Okwa ti elelo paife ngaha ola ongela po oimaliwa ya fika peepelesenda 60 ya dja koishoshela ei hai futwa komalelo odoolopa, oishoshela yaNored naCenored, oshoyo ei hava ongele okudilila keepoloyeka hadi futilwa kovakwashiwana moshitukulwa.
“Elelo loshitukulwa natango ola ongela oshimaliwa shi fike poN$634 615 momukokomoko wodula aishe ei, da nuninwa okulanda ominino domeva.
Ouministeli woimuna nao natango owa udaneka yoo okuvatela nomeva,” Nehale ta ti.
Okwa yelifa yoo kutya elelodoolopa otali kendabala yoo okuundula eepoloyeka edi, opo di dule okukala da pwa pefimbo.
Okwa ti ota kumaida yoo ovakalimo vaShikoto ve li diinike naashi shi li po omanga omauwa taa uya kuvo.