OSHAKATI – Elelo lyondoolopa yaShakati otali ithana aakalimo yomOshakati ye na oondjo dhamuni dhi li komadhina gaasi yi ilopote okuza nena sigo omasiku 31 gaMaalitsa nuumvo opo dhi dhimwe po. 

Omugandji gwomauyelele melelo lyondoolopa Katarina Kamari okwa ti omagumbo ga pita po147 oga ndhindhilikwa ge na oondjo dhi li komadhina gaasi, dhoshimaliwa shi vule oomilliona N$5. 

Kamari okwa ti elelo olya tokola oku shi tula miilonga ngashingeyi. 

“Otaku indilwa aakalimo ya faalele okamutse nonzapo yanakusa osho wo okamutse kaangoka ta ka ninga eyindilo lyedhimepo lyoondjo,” ta kumagidha ngaaka. 

“Oongunga adhihe tadhi ka dhimwa po kelelo otadhi kotha oshimaliwa shoomilliona N$5, ihe shoka otashi ningilwa ashike mboka ya hula ko nale,” ta popi ngaaka. Kamari ta ti omumvo gwa zi ko okwa li kwa ningwa eyindilo opo aantu ya hula ko nale omimvo dha thika 20 ya dhiminwe po oondjo dhawo. 

“Elalakano okugandja ompito kaantu mboka ye li momagumbo paife ya tamukululeko nepandja limwe lya yela, dho oondjo ndhoka dha kala ko dhi dhimwe po kelelo,” Kamari ta ti ngaaka. 

Ta ti, ohashi kala oshidhigu okufuta ko oondjo ndhoka omuntu a adha po nale, onkene elelo otali gandja ompito ndjika opo ya zuulule ko. 

Kamari okwa ti, aantu mboka natango otaya pewa ompito opo ya lundulule omadhina okuza kedhina lyanakusa tali yi kwaangoka lya nuninwa. 

vkaapanda@nepc.com.na