Nonando pwa kala omulandu noompango kutya aakalimo inaya patelwa omeya omolwokukaleka po uuyogoki nokukeelela etaandelo lyomukithi gwoCovid-19, elelo lyondoolopa lyaShikuku olya ti, onkalo olye yi thiminike lyi tete ko omeya gaamboka ye na oondjo.
Omupopiliko gwelelo lyondoolopa yaShikuku John Siloiso, okwa ti oya kala nokusimaneka oompango ndhoka dha tulwa po, ihe pethimbo ndika oya li ya kutha onkatu opo mboka taya vulu okufuta, ya fute iihohela yawo.
“Okwa li twa dhimbulula kutya aantu oyendji otaya vulu okufuta iihohela yawo yokomwedhi, ihe omolwompango ndjoka ya li ya tulwa po kepangelo kutya omeya inaga patwa, oyendji oya kala taya ningi oshiningilawina omanga taya vulu okufuta,” a popi ngaaka.
Siloiso okwa ti, mboka ya kanitha iilonga yawo omolwomatompelo ga yooloka, elelo lyondoolopa otali ka tala nokukwashilipaleka oshowo uukwatya waasho ya kala haya futu omimvo dha piti, opo ya vule oku ya kwathela okudhima po oongunga ndhoka.
“Omeya ngoka taga tetwa ko ogaamboka ya kala noongunga sigo oNovomba gwomumvo gwa yi. Naamboka ye na oondjo sigo oFebuluali gwonuumvo, otaga tetwa ko,” a popi ngaaka.
Siloiso okwa li a yelitha kutya omeya inaga tameka okutetwa ko ashike paife, ihe oya kala taye shi ningi nonando oya li taya tala koonkalo nethimbo ye na okuteta ko omeya.
“Ompito ndjika ombwaanawa okutumbula kutya oomahangano tu li mekwatathano nago ngaashi Namwater oshowo Nored katu na ko oondjo dhasha, no inatu hala okukala noondjo,” ta ti ngaaka
Elelo lyondoolopa olya totha mo kutya oondjo adhihe dhomeya odhi li poomilliona N$15.5.