Elelo lyopamuthigululwakalo lyUukwambi olya yambidhidha oshikandjohogololo shEtayi niilya yookilogalama 600.
Iilya mbyoka okwa li ya gwandja kElenga enene lyUukwambi Herman Ndilimani Iipumbu mehuliloshiwike, sha ningilwa kUukwangula moshitopolwa shaShana.
Ooshako dhiilya yomahangu adhihe ndhoka okwa li dha gandjwa konima Kansela gwoshikandjohogololo shEtayi Hans Haikali a li a ningi omayindilo opo aakalimo yomoshikandjohogololo she ya yambidhidhwe sho taya si ondjala.
‘’Otu na omagumbo ga taalela ondjala moshikandjohogololo shetu, konima kwa li inaaya longa omapya gawo nawa omolwomuloka ngoka kaakwa li gwa dhenga omata pevi nawa omumvo gwa yi,’’ ta ti ngaaka.
Ta ti, okwa li ye shi ningi opo mboka ye li mompumbwe unene ya yambidhidhwe.
‘’Epangelo itali gwanitha okuyambidhidha aantu ayehe ya taalela ondjala, sho osho shoka tatu kambadhala okukonga omayindilo mpeya naampeyaka,’’ ta fatulula ngaaka.
Haikali ta ti, ooshako ndhoka otadhi ka yambidhidha oyendji ya taalela ondjala.
Ta gwedha po ta ti, otaya ka gandja iilya kwaamboka lela ye li mompumbwe, nomadhina gawo oye ga na, oshowo mboka taya ka thika poombelewa dhawo taya kongo omakwatho.
“Otatu pandula elelo lyUukwambi sho lya uvu omakemo getu noku tu yambindhidha niilya ayihe mbika,’’ ta pandula ngaaka.
Ta ti, oshoka onkalo otayi yaga natango kesipa, ota indile natango moshigwana opo shi landule moompandhi dhelelo lyUukwambi, nasho shi yambindhindhe wo naashooka shina po.
Haikali ta ti, otaya yi koongolo opo omumvo nguka ku kale ku na omuloka omwaanawa, aakalimo ya vule okulonga omapya gawo.
Iipumbu okwa ti, okwa li ya yambidhidha ngaaka okukwathela oshigwana.
“Otwa yambidhidha naashoka tu na po, konima kwa li twa pulwa omakwatho. Otatu yambidhidha ngiika oshoka inatu hala oshigwana shi se ondjala,’’ ta popi ngaaka.
Kehe gumwe okwa mona onkalo yomuloka gomumvo gwa yi, hakehe gumwe a li a longo nawa, naamboka kwa li ya likola mo sha oyo aanelago. vkaapanda@nepc.com.na