OPUWO – Elelondoolopa lyOpuwo mEtiyali olya hogolulula ookansela yalyo, ya shuna pomahala mpoka ya kala. Momahogololo ngoka ga ningwa mEtiyali mondoolopa omo tuu moka Rosa Mbinge-Tjeundo, kansela gwongundu yomilamena yoPopular Democratic Movement (PDM) okwa li a hogolululwa ongamayola gwondoolopa inaaya methigathano. Nguka okwa li a ulikwa koshilyo shongundu yawo Kaare Lucuis Mupya.
Kasipo Kakondo, kansela natango gwo-PDM oye ta ka kala omupeha gwaMbinge-Tjeundo. Mupya okwa li wo a hogolululwa ongomunashipundi gwokangundumutima kelelo, omanga oshilyo ishewe sho-PDM, Forester Matjiru Tjijahura pamwe nOmukwaswapo Wilhelmine Nashihua ya li ya hogolululwa ongiilyo ya gwedhwa po yokangundumutima.
Iilyo yongundu yoSwapo Victorino Simon naRuth Nderura otaya tsikile moonkatu dhawo ongiilyo yelelo lyopashitopolwa.
Mangestalata gwomomudhingoloko gwOpuwo Eden Kuneni Amutenya oye a li a ganithile ookansela miilonga.
Moshipopiwa she shetaambeko, Mbinge Tjeundo okwa li a popi kutya ota ka tsikila okukwathela oshigwana, ta ti ota ka wilika nohokwe osho wo nelandulathano ngaashi naana tashi vulika. “Ongamayola gweni, ondi na oshinakugwanithwa okukwatela po uukumwe nelongelokumwe opo ndi kwashilipaleke kutya ewi kehe otali uvika, nakehe oshilyo shomomudhingoloko gwetu osha yalulwa ko ongomuntu,” mayola ta ti ngaaka. Okwa tsikile kutya ondoolopa oya taalela omashongo ngaashi ompumbwe yomeya, evi osho wo ompumbwe yomagumbo, ashike okwa iitaala kutya ayihe mbika otayi ka kandulwa po ngele opwa kala okulonga nombunda yi li moshihwa. “Melongelokumwe otatu vulu okutaalela omashongo ngoka noku ga lundulula ga ete ehumokomeho.
Otandi ka longa nuudhiginini opo ndi hwepopaleke oonkalamwenyo dhaakwashigwana ayehe, moka tatu kwashilipaleke kutya ondoolopa yetu otayi ka kala ehala moka aantu ayehe ya manguluka oku yi ithana egumbo lyawo,” ta ti ngaaka.
Mbinge-Tjeundo okwa ti wo elelo lye otali ka wilikwa koshili nuukumwe-Nampa