Auleria Wakudumo
Omulumenhu weedula 45 okwa xulifa eshi eli mangelekela moshipangelo shepagelo shaMaruru moshitopolwa shaErongo. Oshiningwanima osha ningwa Olomakaya lwopo 22h10.
Oshiningwanima osha kolekwa komupopiliko wopolifi, Deputy Commissioner Kauna Shikwambi. Shikwambi okwa holola ta ti nakufya okwa tongololwa oye Godwin Kauzuu vati kwali ashike a tambulilwa moshipangelo nokweli mangelekela mekende loshipangelo.
Opolifi oya holola tai ti Kauzuu ina fiyapo ombaapila tai popi kutya okweli mangelekela shike novakwanedimo vaye ova shiivifilwa efyo laye.
Oshininganima shikwao, okaana keedula omulongo oka xulifa eshi ka wila momufima.
Oshiningwanima osha ningwa oshivike sha djako, momukunda Iikokola, moshitukulwa shaMusati.
Nakufya okwa tongololwa oye Venasius Amukwaya, eli mondodo onhivali. Opolifi oya holola tai ti Amukwaya okwa monika vati lwaxuuninwa ta danauka nounona vakwao koshi yomuti mepya lwopo 16h00.
Konima, vati olutu laye ashike leli tuwa lili momufima lwopo 18h00.
Opolifi oyati opo tai konakona kutya oshike sha eta Amukwaya a wile momeva.