Omuleli wopamhepo moMariental, omufita Magaret Basson pefimbo ta popi kombinga yokambo kaye kape “Fight back your dignity-rise with glimmer from defeat,” okwa denga omufindo poshinima shomahepekafano pokati kovakulukadi novasamane, ta ti okuli omhinge nao. Basson okwati ita popile omahepekafano moshiwana. 

Basson okwa popya omahepeko taa ningilwa ovakulukadi novasamane shaashi okambo kaye nako otaka longo nokuyandja ouyelele kombinga yomahepeko moshiwana.

 Okwa ti okwa didilika omahepeko taa ningwa efiku nefiku a hapupala moshilongo. 

“Ondi wete kutya omahepeko a hapu ota a etwa keitavelo olo ovakulukadi vahapu ve na kutya otava dulu okuninga keshe osho tashi dulika opo va kaleke po nokueta eehole davo kondjila nande dimwe itadi dulu vali okutulwa kumwe,” Basson ta ti. 

 Basson okwa twikila ta ti okukondjifa kwovakulukadi okutula kumwe eehole, ohashi eta va longelwe ominyonena kookaume vavo vopaihole. 

“Ohashi eta ovakainhu vahapu va dipawe kovalumenhu vavo noshilongo tashi kanifa ovakwashiwana va fimana ovo vena okukala tava yambula po oshilongo nokukwafela ovakwapata vavo,” Basson ta ti.  

Basson okwa ti ovanhu ovena oufemba wokupopya nokulifikamena po ngeenge tava ningilwa oinima ina vei hala kutya nee okookaume kavo kopaihole. 

“Kutya oshiningwanima wa ningilwa otashi ku fifa ohoni shaashi ngeenge wa popi nena oto lombwele oshilongo ashishe, ngaho oto keelele oibuluma i twikile mounyuni nomokati ketu,” Basson ta ti.

Basson okwa ti oinima ya pamba okulifikamena po kombinga yomahepekafano oili imwe a nyola mokambo kaye. 

Okwa yelifa kutya okambo kaye oka popya yoo kombinga youdjuu, okuehama, ehandu, oumbada, onyanya, nokukanifa oukwatya woye molwa ehepeko.

“Okambo oka popya yoo enwefemo lomidingonoko ano omanwife mo ovanhu mwa kwatelwa omaitavelo etu opamufyuululwakalo meehombo,” ta ti. 

Oshitukulwa shimwe shokambo vati otashi tu omukumo nghene omunhu e na okukaleka po oukwatya waye momafimbo ma djuu. 

Caption: Omayepeko naa xule… Omufita Magaret Basson 

Efano: Otwe li pewa