Lasarus Hakwaake
Onamungundo – Ohamba Immanuel Kauluma yaElifas yaShindodola Omukwanekamba kedimo, a dalwa kohamba Nashikwele shaKadhikwa wodikwa yaNamupala waNangobe ou a dala nee ovana vaMpingana ngaashi, Nehale laMpingana, Kambode kaMpingana naMutaleni yaMpingana. Immanuel ye owedimo laNamupala waNangobe oo a li ohamba, ye mumwaina Nashikwele ta dala nee eehamba da shikula ko ngaashi; Pau Elifas, Fillemon Elifas naImmanuel yaElifas kwa li ashike ve lilshikula. Pau Elifas okwa pangela efimbo lixupi, okwa shikulwa kuMartin Ashikoto, ta shikulwa nee kuFillemon Elifas Shuumbwa ko ku shikule nee nawa Immanuel Kauluma Elifas.
Ohamba Immanuel oye ohamba onhine yomeehamba daNdonga odo da lela efimbo lile a lela oulemido 44 konima eshi a kufa po oshipundi shohamba momudo 1975 konima yefyo lohamba Fillemon Elifas Shuumbwa mumwaina.
Mombaapila yaye yomahekeleko ohamba yovaDamaran Justus |Huruhe ||Garoëb, okwa hokolola Kauluma onga omuleli muwa wovanhu aveshe.
“Ka li ashike omuleli wOvandonga ile Ovawambo ashike okwa li omuleli wOvanamibia aveshe koonono,” ||Garoëb, ta ti.
Ouleli nonghalo yohamba Elifas okumangulukila keshe umwe inaku xulila ashike mOvanamibia, ashike okwa ya yoo nokondje yoilongo oko nokuli a lenga ko vamwe.
“Ohamba yaNdonga, ohamba nda putuka nde i fimaneka. [Otwa kala] hatu i talele po natate okudja kounona wange, [a kala] kaume ka tate kopofingo… Tate okwa kala elenga lohamba okudja momudo 1983. Ame onda lengwa mo2015! Kufye natate wange Seppo Kalliokoski okukala omalenga aNdonga osha kala oshinima shefimano linene, twe shi pandula, notwe shi fimaneka…” osho Toivo Kalliokoski oo paife e li koSuomi a nyola kepandja laye ‘Omundonga Omutiligagne’ kofacebook.
Toivo okwa dalelwa moNamibia kovadali vaye va li Ovasuomi ovo va li hava longele moshipangelo shaNandjokwe manga oshilongo inashi manguluka.
MOndonga omwa kala ovaleli vomihoko adishe osho tashi li ulike shoovene shaashi ohamba Elifas oya kala nomalenga ovapopi vOshikwanyama.
Nonande Ohamba Immanuel Elifas haye wotete okutambula ko omalenga okudja kouhamba wOvakwanyama, mewiliko laye otashi li ulike shoovene kutya yee okwa li a tambula ko ovanhu vomihoko adishe nokuva pa oinakuwanifwa. Ina ulika nande okatongotongo, paku shi talele mofuka youshilo wOndonga oo kwa li wa talwa ongo onhele youlifilo, ohamba Immanuel oya longa nokunangeka mo omalenga okudja kouhamba waUkwanyama nokuli.
Pefimbo lohamba Immanuel okwe shi ulika yoo nghee kwa li e na ekwatafano liwa novanhu aveshe, okudja ngoo kovanapolitika ngaashi Petrus Kalangula navakwao okwa longa nawa navo nombili, ovanangeshefa ngaashi ootatekulu Namundjebo, ooShikale, Ismael Shailemo, nooShali, okwa li ashike pe na oshiwana shOvawambo sha ongala noshi na ombili mOndonga omo nopehe na omunyengu nomunhu kutya nee okwa dja peni. Nomalenga omOukwanyama ngaashi ootate Amon Shipanga ovo vamwe a longa navo mokuhanganifa ovanhu. Tatekulu Immanuel Elifas oye Ohamba oyo ya kwatakanifa ovanhu melelo layo, noya pangela oshitunda shaNdonga mombili.
Ngaashi ovanhu aveshe, ohamba nayo okwa li omunhu nande a pelwe efilonghenda lokuwilika oshiwana efimbo lile. Olutu lopanhu ohali kulupa, ohali loloka nokufya, Immanuel Kauluma Elifas okwa fiyapo ounyuni ou mepupi leedula omilongo hatatu nahamano (86). Ohamba yombili ya longo ko shayo, unene eshi ya kala nokulela oshiwana osho pefimbo limwe sha li shidjuu, ashike mekondjo laye okwa ulika ondjila, oshitunda eshi fiile oiheinina va kondje ko.
Ohamba Immanuel ya kondjo ko shayo, ya fiyipo ounyuni ou nomaudjuu amo, nomaadi amo oshoyo ouyi wamo, okwa landula ondjila yovakulu vonale ooxekulu nooinakulu, ooKambode kaMpingana oshoyo Nehale laMpingana. Okwa shikula eemhadi dohamba; Sheepo ShaNamene naXekulu Nambala daKadhikwa, okwa landula yo kaume ke nomuleli mukwao Petrus Shimweefeleni shaKauluma kaShivute ou va lela naye Ondonga eedula da ka pita.