RUNDU-Nomukunda dokusika ko 425, monomukunda horowero mbali Kavango zoupumezuva ntani Kavango zoutokero kuna kara asi kapi kavagwene usura worukukutu mokwedi kwaSindimba. Mukaro gwangesi kapi guna wapa omu guna kuretera vanapolitika vapire kukara tavahesere nawa, ntani kuna kureta nye magano nago peke momukunda ndi megendeso lyomberewa zaKavango koruha nye rovakansela. Awo ngesi vana tameke kulipiraukira vene navene asi yinke yina kuhorokera ngesi. Konyara vantu wokusika ko 174 000 vatunga monomukunda 553 kwavatjangesa melikwamo eli lyokugwana mbatero nondja dorukukutu, momukunda horowero nagunye omu vavatambesera asi vahepa kugwana nsako zousura nkenye kwedi kutunda tupu mwaSiwogedi mvhura zina puko, ano kwedi kuna puko kwato nampili gumwe konyara gagwana usura ou. Yitundwamo yina kutunda momberewa zaKavango regional Council kuna kulikida asi 74 766 movantu valitjangesa yiwo velike vagwanenamo uwa. Muvaru ogu kavagugeve paveta sivike sesi moRundu mosigongi esi asi karako mwankenye mvhura kuhamena rukukutu, omu ava kara asi vagendesikurona noministeli momukunda kukara mosigongi esi. Munasipundi gondango zovakansela vaKavango,Bonny Wakudumo kapere unzone vanamberewa ava vana kurugana kelikwamo eli lyorukukutu asi awo kuna kurugana moomu vana harere kapi vana kukwama nongendeseso edi vaturapo delikwamo eli. Kuna karapo ngendeseso zepuko melikwamo eli, ame kuna kumutantera asi eyi muna kurugana kapi yina kuhafesa vantu ntani kuna reta mukaro dona melikwamo nalinye. Ose vana politika kwaturapo asi ngano ngapi elikwamo eli naligenda, nye one vana mberewa yiyo mwayaturapo nongendeseso deni nyamweni. Yilye gamupa nonkondo mwahana kutupurako mutjindje magano aga twatulirepo? Yimo ana kupura ngoso Wakudumo. Yirugana yeni kutura eyi tuna tokora ose ngovanapolitika moyirugana. Ano nsene asi muna kamona asi egano lyetu kapi lina kurugana nawa, tengureni kwetu tuyalikunde ntani tutare asi kurugana ngapi, kapisi kutjindja tupu pwanyonelike, ose twahana kuyidiva.
Wakudumo simpe kavahomokerere asi elikwamo eli kapi lina kara nekeverero lyewa,unene kevango lyepungwiro. Ndi morwa sinke nye kayihorokere mvhura zina puko asi nonsako dokusika ko 308 kwazonauka komvhura, mvhura zina puko, eyi kwahoroka morwa kwato ekeverero. Eyi yamonekere asi roli zokusimba usura kapi zakara noyiruganeso nayinye yipo asi usura ou vaudumuke naunye nsene asi mvhura kuna kuroka, nye awo vapulisilire roli ezi zize azo mvhura kuna kuroka nokukagavera usura kovantu, yimo sili naturuganeni ndi natutekura vantu ngesi? Age simpe kahomokerere vagava mahauto gawo vagaruganese asi kugusa nonzira donde yipo asi apa navakasika kemunzugo lyemunene nokilo dina ligwederere vagwane mfuto zinagwanene. Negavero nye lyonombuto, eli lina kara kwakugenda kumwe negavero usura, vakansela vamwe kapi vana hafa morwa awo kapi vana kuyimona asi malikwamo aga kuna kara mumwe tupu. Nsene asi ove ono kara nye norugendo rokukatura usura momukunda gwaKahenge, morwa sinke nye nopilira kupitura nayinye usura nombuto okayisige kumwe tupu pevango vana yitumbwidire. Yimo ana kupura kansela gwaKahenge munekuto Joseph Sivaku Sikongo. Nakandrerere vantu turuganeni yininke yoyiwa kovantu vetu,yimo ana kuhundira munasipundi gondango zovakansela. Ogu kakere tapopere vantu vendi mukwatelimo muna mberewakurona zovakansela, Ludwig Thikusho, katente asi esesupo nonsako dousura memunzugo lyepungwiro kwaretesapo nye asi mokwedi kwaSindimba vantu vapire navenye kugwana usura. Usura kapi wakeremo. Wokugava usura kapi vanakuvhura kusikisamo eyi tuna kumbesutera Kavango Mills,yimo ana kutanta Thikusho. Nsene asi ose kapi tuna kugwana usura kwava vana kuukweya, nayituninkisa asi twahepa kugavera usura woowo una karapo. Kuhamena ugendero munamberewagona Jona Kangumbe katente asi vanaturapo malikwamo peke gana kulikida asi kapisi gumwe tupu nagana ugendero. Yipo asi ose kwatokora nye asi kuvatjindja tjindja. Nose tuna dimburura asi ekeverero kuna kara udigu,unene kemunzugo lyokupungwira.yimo ana kutanta simpe Kangumbe. Nokutanta asi makambadaro kuna kugaturapo yipo asi nompito nadinye vahepa kudisitika. Ano vakasnela yipo nye kavatokwere asi kutunda apa Namib Mills vahepa kugava nkenye kwedi nonsako edi dina kara asi yido vahahepa.