Omukalelipo gwaChina moNamibia Zhao Weiping okwa ti osha simana okukala pe na aaniilonga ya pyokoka nawa miimpungu ya yooloka sho Namibia ta ende ta humu komeho. Ta popi pomutumba ngoka gwa li ko moshilandopangelo ngoka gwa li tagu tyapula ekwatathano lyomadheulo pokati kaNamibia naChina, Zhao okwa ti ooprojeka oonene miimpungu ngaashi omahooli otayi gandja oompito oompe kAanamibia ya ilongele ko yo ya ye momakwatathano gopamangeshefelo nayalwe.
“Monakuyiwa, otatu ka kala noopologalama ndhoka tadhi lalakanene okukandula po oompumbwe dhaNamibia. Oopologalama ndhika otadhi vulu okuningilwa moNamibia nenge moChina, moka taku ka talika unene okugwedhela omwaalu goopologalama ndhoka dhi li moNamibia opo Aanamibia ya likole iiyimati iiwana,” Zhao ta ti ngaaka.
Aanamibia oya li wo ya tumwa ya ye koChina hoka ya li ya ka mona omadheulo miimpungu ngaashi yuuhaku, elongo nayilwe. “Oshoka Namibia naChina oya panga uukuume ethimbo ele, ohatu kala aluhe tu uvite uuntsa okumona ookuume yetu Aaafrica taye shi pondola milonga yawo yehumokomeho lyeliko nonkalathano, nopo tatu kala mpaka aluhe tu yambidhidhe mpoka tatu pumbiwa,” Zhao ta ti.
Zhao okwa gandja wo uuyelele kutya omuleli gwaChina Xi Jinping okwa tota po oopologalama ndhoka tadhi kwathele China a tule iilonga omalalakano ge gehumokomeho.
Okwa gwedha ko wo kutya eyambulepo lyoonzo dhopantu olya simana kiilongo ayihe iyali. China okwa longa nuudhiginini okudheula aniilonga ya pyokoka.
Oshilongo shoka ngashiingeyi oshi na oosikola dhuungomba dha konda po11 000, nohadhi dheula aantu ye li konyala aantu ye li oomiliona 10 komvula.
Okwa kwashilipaleke Aanamibia kutya ombelewa yomukalelipo gwaChhina otayi tsikile okulonga pamwe noNational Planning Commission (NPC) osho wo iikondo yilwe yepangelo opo ku hwahwamekwe olongelokumwe pokati kaNamibia naChina.
Ta popi poshiindingili opo tuu mpoka, Ned Sibeya gwoko-NPC, okwa ti osha simana iilongo yi longele kumwe opo ku adhike ehumkomeho.
“Eyambidhidho lyaChina olya kwathela konyala Aanamibia 200 nuumvo, naashoka otwe shi pandula,” ta ti ngaaka.