Kalunga okwa popya ita patanekwa
“Eteni ovamwange” osho a lombwela
Ounyuni aushe e u dulikifa
Oixupe yoshiwanana okwe i alula
Keembinga dounyuni e i kongolola
Novakolonyeki osho va dulika.
Owe shi mwene peni u shi hokolole?
Moupale voita tamu kuwililwa?
Shito ohamu lilwa kwaava tava xwikwa
Eenghwatwe doita tadi yehamekwa
Otashi kumwifa eshi ohaluka
Ovatondi va dja mo mu wile eendjale.
Otwa pandula Kalunga ou e shi ninga
Kape na limbililo okwe shi pitifa.
Okomulungu wondjebo ndele okeindilo
Oshitokolifo kumwe nomailikano
Ohaluka sha ningwa tu shi wetelele
Oshikumwifa shotete moshilongo shetu.
Inashi fa shoshili oto ti ondjodi
Omunhu oto nyengwa okuitavela
Okumona tava i itava keuka
Va fa va sholola nova limbililwa
Ongo tava dilonga notave lipula
Kutya omolwashike va li ve ya kulwa.
Efimano alishe nali pewe Pamba
Kalunga ou ketu iha nyengwa kusha
Okwa lombwela ovatondi ndele va dulika
A tya “Oita nai xule, osho nda tokola”.
Ndele shilishili aveshe va winyuka
Va tya oilwifo yavo tava mboboloka.
Kombwana osho nee kwa ningi koluvanda
Omayoka a dja mumwe nomifuva
Ewi loshiwana osho la tokola
Ovawiliki voshili osho va holoka
Ava ve u likufila osho va monika
Ova lya ko shavo nashi wane manga.
Onda tile ounyuni okambiya komahola
Owahehongo le ku u mukweni te li toola po
Ava va li oikulo nena ovapangeli
Ovapangeli voshito paife ovapangelwa
Ava inava hongwa sha va ninga ovahongwanhu
Ovapukifishiwana mboli ovahanganifi.
Oshilongo oshoovene itashi likufilwa
Ovakolonyeki osho va nyenya mo.
Ehalo loshiwana onda ti etokolo
Onda tile efundja ihali kelelwa
Otali ku pundula li ku twaalele
Ngolongo naave oto yoo mulo.
Fudikeni eendjebo outondwe u fudikwe
Etukauko nali kondjifwe oukumwe nau kondjelwe
Olwoodi ola xula ngeno oliha shuninwe
Eendjebo olukumwa hado oilwifo
Ou wa hala okulwa popya tu pwilikine
Wa hala efindano inda mehoololo.
VaNamibia amushe ondi mu na elaka
Tu tungeni oshilongo shetu shi tungale
Emanguluko letu handjiipangela
Oshinakuwanifwa shetu oshe tu teelela
Ponhele yoilwifo napa ye oilongifo
Ondjala noluhepo natu kondjifeni
Namibia ole li fikamena ndele inali manguluka
Oukoloni owa teka ndele inau dipawa
Oupika owa findwa ndele inatu dja mo
Oukwamuhoko nolutandu ovanandubo nafye
Oungangala nokayova ovafininiki
Onyalo nouhasha ovatondi vetu
Ei aishe kumwe oyo oukoloni
Manga inatu dja mo inatu manguluka.
Abednego Lesheni Nghifikua
Septemba 1990