Auleria Wakudumo
Ovakwashiwana va dja keenhele da yooloka moshitukulwa shaShana noitukulwa yopopepi ova li va hangana moshiputudilo shopombada shoUniversity of Namibia (Unam), Hifikepunye Pohamba mOngwediva opo va ninge eembangi mepalulo lopambelewa lembonghalamwenyo yomupresidente omutivali, tatekulu Hifikepunye Pohamba.
Vamwe vomokati kaavo ve ya okuninga eembangi, ovaleli vominghoko dopamifyuululwakalo da yooloka, ovanangeshefa,ovaleli vopamhepo, oshoyo ovanafikola. Embo ola patululwa pambelelwa koshi yoshipalanyole “Footprints of Hifikepunye Pohamba, sha hala kutya “ondjila eyi a enda”.
Ovakwashiwana novanangeshefa ova udaneka okuyandja oumbo ve dule 100 keefikola moshilongo ashishe.
Omukulunhuwiliki woRani Group of Companies oye nokuli a ninga eudaneko lopombada eshi a udaneka okulanda oumbo 20 ovo tava ka yandjwa keefikola dokonooli odo tadi ka tofwa.
Ngoloneya waShana Elia Irimali naye okwa ninga uedaneko loumbo omuwoi, omo vanhe tava ka yandjwa kombelewa yaNgoloneya, navanhe otava ka adjakanekwa eefikola mwa twatelwa ofikola yaye yopedu mOshana.
Omushangi wembo “Ondjila Eyi a Enda” Ellen Namhila okwa holola ta ti tatekulu Pohamba okwa wanifapo aishe molweendo nghalamwenyo yaye okudja kedalo fiyo omounyuni woita omo vali tava kolonyekwa.
“Nonande okwa dengwa, a tulwa modolongo, nolutu laye ola uda oululume aushe ou, omhepo yaye kayali kateka omukumo shaashi okwali a hala okumangulula Namibia kovakolonyeki,” Namhila ta ti.
Namhila okwati onga omukondjeli manguluko, Pohamba okwapitila moipyu nomoitalala okumangulula oshilongo shaye.
“Onga omushangi, ondi udite etumba okushanga ondjokonona yatatekulu Pohamba. Kwaame, okushanga ondjokonona yaye okwali shafa ouyelele mefilu lomilema. Okuhokolola onghalamwenyo yoye otashi eta omukumo nokuhekeleka yoo ovanhu mokukalamwenyo,” Namhila ta ti.
Namhila okwa holola ta ti oumbo vondjokonona nghalamwenyo yatatekulu Pohamba paife otava dulu okumonika. Okwa indila ovakwashiwana op ova lande, vat wale komaumbo opo ovanyasha nounona vomapupi taeya va leshe nokuhokolola navakwao ondjila oyo ya endwa kuPohamba.