Omunyasha gwedhina Emilia Emvula okwa ti omutumba ethete, sho osho shoka e ya po nongeshefa ye yokuthula aantu, osho wo okwoopaleka iipala osho wo oompadhi.
Emvula oku na ongeshefa tayi ithanwa Emie’s Beauty Spa yi li mOshakati kEkuku, ndjoka a li a toto nuumvo.
“Onkalo oya li ondhigu sho nda kala nokukonga iilonga, ihe itandi mono. Onda li nda gongele okamaliwa hoka nda tameke nako ongeshefa sigo nda thiki mpaka ndi li nena,” ta popi ngaaka. Ta ti ngashingeyi okuuvite kutya ye omunageshefa gwoshili oshoka oku na iiyemo yimwe tayi ya po, tayi zi mongeshefa.
Emvula ta popi nomuthindo ta ti, kape na omuntu a valwa omukwanaluhepo ihe oluhepo ohalu ya oshoka aantu inaya hala okulonga, ihe kape na ngoka te ku longele ngele ito thikama ngoye mwene.
“Otandi kumagidha aanyasha ayehe mboka ya kuutumba momagumbo kutya naya dhiladhile kutya oya pewa omagano gashike taya vulu okugalongitha opo ya ete po iiyemo ya vule okwiihupitha yo yene.
“Oshimaliwa shokutameka ongeshefa hasho eyipopilo nande, aantu ohaya kwathelathana,” Emvula ta kumagidha ngaaka.Ta ti, ke na ehala lyokulongela ookasitoma dhe, oha hiila ashike omolwiiyemo inayi gwana natango, ashike ota ti moomvula ntano twa taalela okwa thaneka ehala lye lyokulongela lyi na iinima ayihe. Ta ti, oku na ohokwe yokulonga kehe ngoka ta ka landula onkatu ye, oshoka aniwa ngele to gandja natango oto mono oshindji, shi vulithe sho wa li wu na nale.
Ano ontseyo nayo otayi ende ya uka pombanda.Emvula okwa ti oku na ohokwe yokulonga nuudhiginini, opo wo a fe aanengeshefa aanene, ehala osho wo niilongitho mbyoka inayi gwana oyo ashike uupyakadhi.
Ta ti, ngoka e na ehalo lyoku mu kwatha a hume komeho ote ke mu pandula lela.“Aanyasha yopaife otwa hala okuningilwa kehe shimwe, omanga thimbo limwe tatu vulu okulonga noonyala dhetu, tu ikwathe tse yene, ihe kehe shimwe otwa hala ashike epangelo lyi tu ningile,” Emvula ta ti ngaaka.
Ta ti, ngele owa tegelela okuningilwa nenge okupewa ongoye mwene to ishunitha monima nethimbo lyoye to mana po.Ta gwedha po kutya, oku na eitaalo kutya kehe shimwe otashi vulika, ngele owu na omukumo, oonkondo nehalo lyoku shi ninga shili.
Kookasitoma ndhoka natango ehalo lyokwoopalekwa nadhi dhenge konomola 081 650 5755.
-vkaapanda@nepc.com.na