Endiki loChrist Hope International Namibia ola taalela eshongo linene loikulya, oipundi omambo noikwafifo yofikola ya yooloka hai dulu okulongifwa kounona.
Endiki li li mOshikuku ohali tonatele ounona ve na omaulema a yooloka nounona veefiye hava pewa eetundi noikulya ponhele opo.
Omukulunhu wendiki loChrist Hope International Namibia Tresia Shiningayamwe okwa ti endiki lavo ohali tonatele oshali ounona aveshe ve na oulema ile vehe na ovadali vavo.
Okwa ti elalakano okuyandja ohole nokukaleka po ombili nehafo kounona eshi hava kala ve li mefiloshisho la wana.
Shiningayamwene okwa ti endiki lavo oli na ounona 121 hava tonatelwa ponhele opo okudja Omaandaxa fiyo Osoondaxa omanga ounona vamwe ohave uya po konima yeetundi opo va pukululwe oilonga yavo nokupewa oikulya.
“Otwa didilika ounona vahapu tava mono oixuna eshi vehe na ovadali vavo omanga ounona vamwe ove na oulema eshi hava kala va talela eshongo linene loikwafifo. Onghee naashi osha eta opo ndi tote po endiki eli momudo 2003,” Shiningayamwe ta ti.
Okwa ti otai indile moshiwana opo shi ya mbidide endiki lavo noikulya, oikutu, oikumbafa, omatalashe, oikwafifo yofikola ya yooloka.
“Paife ohatu longo noudjuu shaashi ka tuna sha oikwafifo ya wana okuyambidida ounona 121,” Shiningayamwe ta ti.
Okwa ti ku keshe ou e na ehalo lokuyambidida nakwatafane naye 0814223900 ile oshiwana shikwatafane nombelewa yakansela woshikandjohoololo shaShikuku.
Okwa weda po ta ti endiki lavo oha li tambula ounona aveshe ve li momhumbwe onghee oshiwana osha manguluka opo shi kale sha twala ounona vavo kondike eli.