Oikondo ya yooloka mwa kwatelwa ovanangeshefa novanafaalama vomoshitukulwa shaMusati oya hokolola ngoloneya mukulu ou a ya moshipundi shopendjela Erginus Endjala tava ti okwa li omuleli muwa e na elongelokumwe.
Endjala okwa ninga oshivilo shokulekela oshiwana sha li ko Etitano kOutapi.
Koshivilo okwa li ovanambelewawiliki koikondo ngaashi ehongo, ohauku, omayolola veedoolopa da yooloka domOmusati oshoyo omukulunhu wopolifi mOmusati nosho tuu.
Ova popi vova tanga Endjala onga omulumenhu omunambili nokwa longa noudinini okuyambula po oshitukulwa shaMusati.
Pefimbo loshivilo Endjala okwa tumbalekwa nokupewa omaano a yooloka.
Paife ngaha Immanuel Shikongo oye a ninga ngoloneya mupe waMusati konima eshi a ulikwa komupresidente.