Ehangano lyedhina Engen Namibia olya gandja omagano goshimaliwa N$1 million okutungitha oongulu dhosikola oompe dhi li ne moshitopolwa shokomikunda kuumbangalantu woshilongo. Omahala ngaka okwa li ga gandjwa mEtitatu kOminista yElongo, David Namwandi, poshituthi shopambelewa sha ningilwa mOshitopolwa Oshana. Aayenda yalwe mboka ya li mpoka, omwa kwatelwa Ngoloneya gOshitopolwa Oshana, Clemenus Kashuupulwa, Omukuluntu gOshikondo shElongo mOshitopolwa, meme Dutte Shinyemba oshowo omutaleli moshikandjo shelongo. Oongulu dhosikola otadhi ka gwedha ko komuthika gomanongelo gaali gokomikunda mOshitopolwa Oshana, ngaashi pOprimasikola yUukwiyuushona oshowo Oprimasikola Okatana. “Oosikola ngashingeyi otadhi vulu okukala naalongwa ye li 180 ya gwedhwa po – shoka tashi ti mongulu yimwe yosikola otamu vulu okukala aanasikola ye li 45.
Oongulu dhosikola dhika otadhi ka nengeneka othina mOondondo okuza 0 sigo 1,” osho Omunambelewa omukuluntu gwoEngen Namibia ta yelitha. Hamunyela okwa gwedha po kutya okampani oya unganeka wo omukalo gokulanda (iitungitho) oshowo okuhogolola okampani yokutunga, nokwa li wo ya kwatelwa mo nenge ya longele kumwe nokutonatela iilonga yomatungo oshowo etalelo lyomatungo, opo ku shilipalekwe kutha iinakugwanithwapo ayihe oyi iyuthwa kuyo oshowo oopulana dhomatungo. Megwedhopo, omahangano gaheyali goEngen moshitopolwa okwa li wo ga zimine okugandja omagano giipundi yosikola yi li 180 oshowo iitaafula yoongulu dhoka dhosikola, omanga Jan Everson of Seal consulting Engineers – ehangano lyooindjiniya lya ganda omagano ge nasha nomayakulo gokuungaunga niilonga yootendera dhiilonga oshowo omukalo gwetonatelo. “Engen Namibia oya koneka omashongo pethimbo ndika ga taalela epangelo oku shi talela momatungo unene miitopolwa yokomikunda,” osho Hamunyela ta ti. “Ondungethaneko yOmumvo 2030 otayi vulu awike okwaadha omalalakano gayo ngele aakuthimbinga ayehe, mwa kwatelwa oshikondo shopaumwene, taya kutha ombinga miinakugwanithwapo yawo nokweeta po sha shi nasha nomapendulopo gemona, oshowo okupendula po omahumokomeho gopankalathano mokati kaakwashigwana,” osho ta ti. Omunambelewa omukuluntu goEngen Namibia okwa gwedha po ta ti kutya ongehangano limwe lyomomahangano gokugandja omayakulo gomahooli moNamibia, Engen oku uvite e na oshinakugwanithwa okugandja sha moshigwana, nokulongitha oshimaliwa shontumba mokukaleka po ehumokomeho mokati koshigwana.
“Otwa hala okugandja sha shi nasha nonkalonawa yiigwana moka – aakwashigwana moka, hatu gandja omayakulo gopaunangeshefa. Elongo olyo unene li li komitima dhetu, oshoka olyo onakuyiwa yetu,” osho ta ti. Engen ota ka tsikila ishewe nokukala mekwatathano noosikola dhika mbali, pamukalo gokukaleka po oongulu dhika dhosikola, okugandja omagano gomambo goondondo okuza 0 oshowo 1, oshowo okukaleka po ookinda momalukanda giinyakwi mOvenduka oshowo mOmbaye, ano moondoolopa moka mu na oombelewa dhawo oonene oshowo oompungulilo dhiikwamahooli yehangano ndika.