Taimi Haihambo 

Ovakalimo vomoshitukulwa shaShikoto moshikandjohoololo shEengodi, ova tameka okufula eendama molwenota eli la nyaa kehonga. 

Omukwatelikomesho woshikonga Walaula Belsior okwa ti oshikandjohoololo oshe lihanenwa unene kenota, omo omatale neendobe dihapu da ninga ashike onhata doo dimwe oda pwiinina. 

Vati omunhu ngeenge owa i koshikandjohoololo shEengodi unene tuu momikunda edi de lipyakidilwa nokufewa omatale neendobe, eenduda domalandifilo otombo noikunwa yokeengoma vati oda pata shaashi ovanhu ove lipyakidila nokufa omatale osho yo eendobe odo da ninga eenhata paife. Vati ohadi patuluka ashike eshi ovanhu va mana okulonga. 

“Peenhele dihapu moshitukulwa oto hange ashike pe na nande okamufima kamwe, oko haka nuwa kovanhu aveshe noimuna. Oshili ouxupilo u li ngaha owe tu fininika tu tameke opoloyeka yoludi eli,” ta ti. 

Kansela woshikandjohoololo shEengodi Neshuku Protasius okwa ti ouyelele owa fika mombelewa yaye, nokwe u kufila ko embale komutwe. 

“Ovanhu vahapu moshikandjohoololo shange otava mono oixuna kenota shili, notava xupu shokadila,” ta ti. 

Okwa ti moshikandjohoololo omu na eemboola da tungwa da pwa, doo vati oda tulwa omashina okudinda omeva, ashike fiyo opapa inadi patuluka paveta. 

Okwa ti natango eenhele dimwe moshikandjohoololo natango odi na ominino domeva da fika, ashike omeva ihaa fiki ko keenhele oko. 

“Hano oyo oi li imwe yomashango aa hatu taalele efiku nefiku,” Neshuku ta ti. 

Ngolonenya woshitukulwa shaShikoto Sacky Kathindi okwa ti ouyelele wenota la nyaa kehonga moshitukulwa shaye oku u shi nawa, neelopota dihapu di na sha nenota lomeva oda fika mo mombelewa yaye. 

Kombinga yominino domeva vati omolweenghono dokunana omeva okudilila komashina akula aa e li kOshakati, osho yo oshinano. 

“Onda ninga onghendabala osho yo omapekapeko nghee ndi na okuvatela ovanhu ava, osho yo nghee ndi na okufya oshisho kutya omeva okwa fika kovanhu okudilila kominino edi di li ofika paife ngaha, osho yo emboola edi natango di li ofika itadi longifwa. 

Omakwafo oku li metifa, nokomesho yomafiku ashona shima omapuko apu okupukululwa nokulongululwa, ovanhu ove na ashike okukala va mona omeva avo,” ta ti. 

Okwa ti ava va tameka okufa omatale neendobe okwe va pandula, ashike nande ongaho okwa tula omalongekido peenhele opo ovanhu ava vapumbwa omeva vakale vamona omeva. 

Okwa ti yoo okanslela ovamanguluka oku talelapo ombelewa yaye, opo va ete omadjuu okoikandjohoololo yavo voo vadule oku akondeka. 

Natango ombelewa vati oya yeulukila yoo ovakwashiwana efimbo alishe vadule oku eta omaudjuu avo kungoloneya. 

taimihaihambo2000@gmail.com