Charles Ndeumane
Aakalimo yomomukunda Omhalapapa moshitopolwa shaHangwena – ngoka gu li oshinano oshishona lela okuya koongamba dhaNamibia naAngola otaya lili ompumbwe yomeya.
Ngoloneya gwoshitopolwa shaHangwena Sebastian Ndeitunga okwa ti onkalo yenota moshitopolwa she onene noonkondo.
Anuwa omvula ndjoka inaayi loka nawa nuumvo oya gwedhela onkalo ndjoka, omatale agehe ngoka haga kala nomeya oga pwina.
Pethimbo lyoonkundathana, Ndeitunga okwa ti epangelo olya longitha oshimaliwa shomwaalu ogundju unene mokufula oomboola dhomeya moshitopolwa shaHangwena ashike omupya omunene oomboola odhindji odhi na omeya goshimongwa, itaga vulu okulongithwa kaantu nenge okunuwa kiimuna.
Nonande epangelo tali ningi oonkambadhala dhokufula oomboola, Ndeitunga okwa ti aantu moshitopolwa moka otaya yaka po oopomba dhokoomboola ndhoka.
“Konyala oopomba dhi li 25 ngashiingeyi odha yakwa po, omuntu ta yaka po opomba ndjoka hayi gandja omeya kaantu ye li 500 niimuna yawo, osha puka notandi indile aalumentu mboka taya longo iilonga ya tya ngaaka ya dhiladhile muule ee taya kala ye na olukeno naantu aakwawo,” osho Ndeutunga a popi ngaaka.
Ndeitunga okwa indile aanangeshefa naantu pauhandimwe mboka ye na iilongitho yomashina yyokfula oomboola nenge oonzo dhilwe tadhi vulu okuyambidhidha mokufula oomboola opo ya yambidhidhe oshitopolwa shaHangwena.
“Otwa pandula kaanangeshefa mboka ya gwanitha po omauvaneko gawo gokufulila aakalimo yomOhangwena oomboola dhomeya, naya tsikile nokukwathela oshigwana.
Ashike onda koneke kutya aanangeshefa yamwe ohaya ningi owala omauvaneko gokukwathela oshigwana opo oongeshefa dhawo dhi tseyike.
Ito vulu okuuvanekela aantu ya sa enota omeya ndele eto ke ya po nomaipopilo ga yooloka sho inoo gwanitha po euvaneko lyoye, ngawo oto dhana nomaiyuvo gaantu oshoka omeya oshinima sha simana noonkondo,” ngoloneya ta kunkilile ngaaka.
Omukalimo gwomomukunda Omalapapa moshikandjohogololo shaMundaungilo moshitopolwa shaHangwena Joseph Kashona okwa lombwele oshifokundaneki shika kutya oshitopolwa shoka oshi li mompumbwe onene yomeya giimuna.
“Onda kala mo oomwedhi hetatu ngashiingeyi momukunda muka ashike otandi kwashilipaleke kutya onkalo yopamahupilo oya uka ashike kuuwinayi kehe siku. Kakele kondjala ndjoka ya guma aantu niimuna, iimuna yetu otayi si kenota.
Ohatu ende iinano ookilometa dhi thike lwopomulongo opo tu adhe omeya gokunwetha iimuna,” Kashona ta ti.