Charles Ndeumane
Kansela gwoshikandjohogololo shaKatyali Joseph Mupetami okwa ti omikunda odhindji moshikandjohogololo shaKatyali odha taalela ompumbwe yomeya giimuna ndjoka tayi eta omaipumomumwe pokati kaaniimuna noya pumbwa eyambidhidho lyomeendelelo.
Pethimbo ndika oshilongo sha taalela onkalo yoshikukuta aanafaalama mboka ya ka konga uulithilo koshikandjohogololo shaKatyali niitopolwa yokombuga ngashingeyi otaya kwandjangele nenota lyiimuna.
“Onkalo yomeya giimuna moshitopolwa shetu otayi tameke okweeta oontamanana nomaipumomumwe mokati kaanafaalama oshoka omeya itaga ende, yamwe otaya paathana oombedhi kutya olye a pata omeya nosho tuu. Ominino ndhoka dhe eta omeya komikunda dhetu huka omishona oshoka okwa li dha ningilwa ashike omagumbo omashona ngoka ga li momikunda ashike ngashingeyi omwaalu gwaantu ogwa londa molwaanafaalama mboka haya mbombolokele huka taya kongo uulithilo onkene omeya inaga gwana,” Mupetami ta ti.
Mupetami okwa ti omikunda ndhoka dha gumwa unene kompumbwe yomeya giimuna ongaashi Okapopo, Enkavu, Oniimbwele, osho wo Omatokele nota indile ngele Namwater ota fala ko omunino gwomeya eshi ninge mbala pethimbo ndika enota lya pimbila.
“Otandi pandula Namwater oshoka ota kambadhala ngaa okweeta ko omeya kiitopolwa yetu, nonande otwa pumbwa ekwatho lyomeendelelo onkalo yetu itayi fe yokOshikoto hoka aantu haya lala nenota kaaye na omeya. Inatu ndhidhilika nande omwaalu gwoongombe dha sa kenota,” osho Mupetami a popi ngaaka.
Omukalimo gomomukunda Okadhiya moshikandjohogololo shaKatyali Mekondjo Uukwiyu Uushona okwa ti kakele kenota omwiidhi gwiimuna nago kapu na sha, anuwa aanafaalama yamwe oya hinga nale iimuna yawo ya shuna komagumbo. “Koshitopolwa huka tse ihatu kotha, ohatu lala noongaku koompadhi twa kalela omandoloma gomeya oshoka shampa wa zi po oto adha mushiinda a kutha po ondoloma yoye a tule po ye. Ashike natango kashi ivule, nomwiidhi kaku na sha huka, Uushona ta ti.