ONGWEDIVA – Ovakwashiwana moshitukulwa shaShikoto otava hupu shokadila molwenota olo la etifa fiyo ovanhu vamwe vomoshitukulwa va tameke okutwa ominino domeva, opo va dule okunwa.
Omunambelewa omukulunhu koshikondo shomeva moshitukulwa Stevenson Tuukondjele okwa ti mOshikoto omu na oikandjohoololo ihapu i na omaumbo a pumbwa omeva. Oikandjohoololo ngaashi Eengodi omo mu na omaumbo e li 4 120 ehe na omeva, Nehale Lyampingana 4 265, Okankolo 5 972 oshoyo Omuthiyagwiipundi omaumbo e li 5 972.
Tuukondjele ta ti eenhele dimwe moshitukulwa odi na eetenga domeva, ashike omeva ihaa dulu okuwanena ovanhu aveshe. Okwa hokolola keenhele dimwe ku na ominino da kulupa neenghono, itadi dulu okupomba omeva a ye kokule a fike kovanhu.
Omunambelewa ou okwa twikila ko yoo kutya, onghalo yomeva taa nyangwa okwa eta opo ovanhu keenhele dimwe va twipule ominino diheshi davo opo va dule okuteka omeva. “Omunino womeva shima wa twiyulwa ohapa piti efimbo, opo u dule okumonikwa u pangelwe. Ngeenge twa mono oudila ve lihanena ponhele yonhumba ngaho otashi ti ope na omeva a topa. Efimbo limwe oudila ihava monika diva,” Taukondjele ta weda po.
Okwa tumbula yoo kutya ovanhu ava ve na ominino dopaumwene, opamwe naNamwater otava mono oixuna shaashi ohave lihange ve na eepomba itadi ende ile tava ka futa oimaliwa ihapu, shaashi ominino davo da tuwa.
“Namwater ota mono oixuna shaashi omeva aa taa hepekwa ohe a yandje oshali, nokonima oye ashike ha ka futa oimaliwa ihapu,” Tuukondjele ta weda po.
Okwa popya yoo kutya, ombelewa yeyandjo lomeva oya tula omalandulafano peenhele opo va dule okupopya nokukunghilila ovakwashiwana kombinga yoshiningwanima eshi.
Tuukondjele ota pula yoo epangelo li kwafele nokuyandja eetenga domeva moshitukulwa, omolwovakwashiwana va lopotwa va wila nokufila meendungu.