Auleria Wakudumo
Ouministeli woilonga owa lombwela ehangano lokutunga lOvachina, hali ifanwa Zhongmei Engineering Group Pty Ltd, mOvenduka opo li pate, sha landula omafyo ovanailonga vavali ovo va ehamekwa shi nyanyalifa nokuxulifila monhele yoilonga oku dja omwedi wadja ko.
Oshiningwanima eshi shi talala osha mEtitatu loshivike eshi, eshi omunailonga a dengwa koshinima shawa keshina lokutumba oinima idjuu. Oshiponga shimwe natango sha holokele moZhongmei muSeptemba.
Omukulunhuwiliki wouministeli woilonga Lydia Indombo okwa ti molwa onghalonawa neameno, ova lombwela Zhongmei engineering opo i kangheke oilonga yavo shaashi ouministeli owa mona kutya ehangano inali tula eameno lovanailonga komesho, novanailonga otava longo monghalo iheshi kulididimikilwa.
“Konima yomapulo, ouministeli owa konaakona kutya omuyandji woilonga ou okwa yengwa okukaleka onhele yoilonga ya amenwa, oilonga ya amena ovanailonga opo vaha mone oshiponga,” Indombo ta ti.
Indombo okwa ti omunashilonga oo a xulifa okwa lombwelwa komuhona waye a tulike oinima idjuu omanga ina djala oikutu yoku mu amena. Olopota oyati yoo kutya vati nakufya kali ena eshiivo mokuinga oyo, nokwa longa ina kalelwa. Nonande ouministeli woilonga owa pata Zhongmei, ongudu yovanhu ya kwatelwa komesho konapolitika Michael Amushelelo oya twala oshikumungu kombelewa yovanailonga mOvenduka omo va xwikila omataiela mopate poshivelo shombelewa.
Amushelelo okwa ti eshi okweshi ninga opo a ouministeli woilonga ukale hau kufa omatokolo omeendelelo moipambele yeameno noukolele wovanailonga, ovanailonga tava li tava pi kovahona vavo naimwe ya pambafana.
“Odula ei, onda popya kombinga yOvanamibia vavali va xulifa momake omahangano Ovachina tava yelula omakende ashike ouministeli kauna eshi wa ninga po, mbela otwa pumbwa oshixwika po omahangano ovachina opo eameno lovanhu vetu li tulwe komesho,” Amushelelo ta ti.
Zhongmei okuna ombelewa yakula moshilandopangelo Nanchang, mOchina. Ehangano olili momahangano dingi 250 onga ehangano tali dulu okupewa eetendela mounyuni noli li po111 okudja mo2016.