ONGWEDIVA – Omupresidente Netumbo Ndandi-Ndaitwah okwa ti efyo lovanhu va xulifa omudo 1988 moshiponga shoboma ya topa kombaanga yoBarclays mOshakati ola kuma Ovanamibia aveshe.
Okwa ti naashi osha eta opo a ka kwashilipaleke kutya epangelo ola tungulula ombila nokutula ko emanya loshinanena omo mwa fudikwa ovanhu 17 va xulifa.
Edi okwe di oda popiwa moshipopiwa shaye sha leshwa komupedupresidente Lucia Witbooi pefiku ledimbuluko la li ko Osoondaxa pongeleka yaElcin mOngwediva.
Moshiponga eshi shoboma ya topa omwa xulifila ovanhu 27 omanga ovanhu 70 va mona oshiponga.
Oboma oya topa pefimbo ovanhu va hangika meni lombaanga mwa kwatelwa ovanashilonga ngaashi ovapangi, ovahongifikola nosho tuu.
Ovanhu vamwe ova fudikwa keenhele da yooloka ashike 17 ova fudikwa komaendo e li mOngwediva moshitukulwa shaShana.
Ombila ei oya tungululwa konima eshi ngoloneya waShana Hofni Iipinge a shivifila ombelewa yOmupresidente osho yo minista wetanga leameno kutya ope na ombila ya kulupa noya pumbwa okutungululwa.
Okudja opo omupresidente naminista wetanga leameno ova tambula ko ediladilo la yandjwa kungoloneya ndele epangelo tali tungulula ombila ei.
Nandi-Ndaitwah okwa popya ta ti efiku eli ola fimana okudimbuluka ovanhu ovo va kanifa eemwenyo pefimbo loboma ya topa.
Nandi-Ndaitwah okwa yandja omahekeleko kovakwapata voonakufya va xulifila poshiponga eshi.
Okwa pandula ngoloneya waShana eshi a eta po ediladilo eli molwaashi ovanhu va xulifa okwa li ovanashilonga veendodo da yooloka tava yakula kwa li oshiwana.
Toivo Herman ou naye a xupa moshiponga, okwa li ta popi ponhele yooluxupe vakwao, ta ti efiku eli ola fimana kuvo shaashi natango ohave lipula vakwao ovo va xulifa.
Okwa ti nonande va xupa moshiponga, natango ove na oulema osho yo okuhepekwa komadiladilo ngeenge tave lipula oshiningwanima eshi.
Herman okwa pula epangelo opo li kale tali dimbuluka efiku eli omudo keshe shaashi ola fimana mondjokonona yaNamibia.
“Katu udite ombili eshi pa pita eedula nhano efiku eli inali dimbulukiwa. Otwa pandula ngoloneya waShana eshi e tu hanganifa nena mefiku eli okudimbuluka vakwetu va xulifa,” ta ti. -fhamalwa@nepc.com.na