Auleria Wakudumo
ONGWEDIVA- Epangelo ola yandja oihauto ihetatu keemhangu dopamufyuululwakalo okunghonopaleka nokukwatela kumwe ouyuuki pokati keemhangu dopamufyuululwakalo.
Oihauto ei oya yandjwa komuPrima woshilongo Elijah Ngurare opamwe naminista wouyuuki Fillemon Wise Immanuel. Pefimbo ta yandje oipatululo yeehauto, Omuprima okwa holola kutya oihauto otai ka kwafela eemhangu dopamufyuululwakalo okulonga noupu ngeenge tashiya koyeendifo unene tuu momikunda.
“Eemhangu dopamufyuululwakalo odo eemwoongo dombuda deemhangu adishe moshilongo. Nena ohatu yandje oihauto ei molwa oilonga iwa oyo mwa kala nokulonga moshiwana okukwatela po ouyuuki, ”Omuprima ta holola.
Oihauto ei oya pewa eemhangu dopamufyuululwakalo dili hetatu, mwa kwatelwa Kambazembi, Maharero, Masubia, Ondonga, Oukwanyama, Ovambanderu, Uukolonkadhi nUukwambi.
Ngurare okwa fatulula kutya oihauto oya yandja kwa talwa keemhangu odo dili momhumbwe yoyeendifo oshoyo odo da dumbalelwa koilonga ihapu oyo ya pumbwa ekwafo loshiendifo.
“Nande ongaho, epangelo olina nale omangela okuyandja oihauto keemhangu adishe 34 moshilongo. Eshi otashi ka ningwa konima youle wokafimbo kanini,” Ngurare ta ti ngaho.
Nguare okwa holola kutya omhangu yopamufyuululwakalo ohai kwashilipaleke kutya oya lalakanena ouyuuki momukalo upu, uhena ondilo nokukwatela po eenghulunghedi dovakwashiwana.
“Oyiendifo nomakwafo makwao a yandjwa kepangelo otaa ulike elongelokumwe nekwatafano liwa pokati keemhangu nepangelo,” Omuprima ta ti.
Omuprima okwa indila elongelokumwe nekwatafano lakola pokati komalelo omufyuululwakalo. Okwa ti elongelokumwe ohali kwatele po ombili nelandulafano moshiwana.
Omuprima okwa kunghilila yo ovaleli vopamufyuululwakalo opo va kale vena ohokwe moikulya yoshiAfrika. Okwa holola kutya okwa hala okumona omukunda keshe una oshikunino shao omo hava xupu ponhele yokukalanda oikulya meefitola oyo ya longwa momikalo da yooloka.
Minista wouyuuki Fillemon Wise Immanuel okwa fatulula nghene eemhangu daNamibia da totwa, omhangu yopamufyuululwakalo oshoyo omhangu ei ya kula.
Okwati oshilongo osha tota eemhangu edi mo1989.
-wakudumoauleria@gmail.com