Auleria Wakudumo
Ouministeli womidingonoko, oixwa nomapashiono owa tokola oku dipaa oifitukuti ili 723 opo ku topolelwe ovakwashiwana ava ihava tema.
Omunambelewa-kulunhu wepitifo lomauyelele mouMinisteli womidingonoko, Romeo Muyunda okwa ti ouministeli mepitiko lomutumba wopashiwana, ota li ka yandja ombelela yoifitukuti oku kwafela oshikukuta moshilongo okudja kepangelo.
“Oinamwenyo 723 oyo ta i ka yandjwa kouministeli womidingoko, oixwa nomapashiono omwa kwatelwa vati eendjabameva 30, eendjaba 83, eengolo 300, oupundja 50, eengalangobe 60, eemhuulu 100, naikwao ihapu. Oinamwenyo ota i ka dja vati moikunino yoinamwenyo oyo yeli hanena oshilongo ngaashi, Namib Naukluft Park, Mangetti National Park, Bwabwata National Park, Mudumo National Park no Nkasa Rupara National Park. Eshi ota shi ka ningwa ningwa momukalo wangungila ita ku piyaanekwa ovatalelipo neenhele omo,” Muyunda tati.
Ouministeli ota u ka yandja yoo ombelela imwe yoifitukuti kovanhu a va ve li vati meedolopa, unene ava ve li peenhele deameno nekwatelepo loinamwenyo nomudingonoko. Eandjo lombelela, Muyunda ota li kwafele ovakwashiwana oku lundulula oikulya yavo yefiku keshe, ota ti yoo kutya eandjo lombelela ota li kwafele okukandula po oluhepo. “Eshi oshimwe shomomaupyakadi a pumbwa okukandulwa po moshiwana ngaashi, eandjo loilonga, naikwao.” ta fatulula.
Kape na omalimbililo kutya oshikukuta osha denga oitopolwa yoinamwenyo ihapu moshilongo. Ediapao loifitukuti 723, ota li kwafele vati okukaleka po oulifilo ou uli po moikunino yoinamwenyo omo ouministeli u wete omwaalu woinamwenyo waya pombada unene. Osho nee, omalongekido okwa ningwa nombelewa yomupedu minista na Meatco opo oministeli yomidingonoko i yandje ombelela yoifitukuti koprogramma yoshikukuta.
Oshiwana osha pumbwa okulongela kumwe nokukwatela po oinamwenyo yomofuka. Edipao loinamwenyo yomofuka, naikwao imwe ota i ngabeka nokuteya po eliko loshilongo shetu.”Muyunda ta nyenyeta.
Ouministeli owa shambukwa, eshi ta u kwafele oshiwana pefimbo eli lidjuu loshikukuta nopefimbo oshiwana sha pumbwa efafo lela okukondjifa oshikukuta. Muyunda okwa kwashilipaleka kutya ovaNamibia ita va kwafelwa ashike mokuyandja ombelela yoifitukuti pefimbo loshikukuta, ndele ouMinisteli owa kala ha u kwafa eedula adishe odo da djako okuyandja ombelela koshilongo, koitukulwa, nokoitufi yomifyuululwakalo, okulandula omilandu noveta odo di lipo.