Ombelewa yomupilimaminista oya ti omagumbo ge vule 300 000, miitopolwa yi li itatu otaga tsikile nokupewa oshikukuta.
Ombinga yimwe yOmusati, Erongo oshowo Kunene oya ningi ethimbo ya taalelwa koshikukuta.
Ndhoka okwa li dha popiwa komupevipilima minista Netumbo Nandi-Ndatwah, sho kwa li taya gandja uuyelele kombinga yomayakulo ga gandjwa moshigwana nuumvo.
Nandi-Ndaitwah okwanli ta popi ngaaka poshigongi sha li sha ningwa koWindhoek, okundathana nkene epangelo lya longo, nomaupyakandhi lya tsakaneke.
“Epangelo okupitila mo “disaster management risk” olya longitha oomilliona dhi vule N$100 000, moka mwa kwatelwa iikulya yongushu yoomilliona N$67 oshowo okulongekidha omeya, okuyambidhidha oshigwana omolwoshikukuta,” Nandi-Ndaitwah ta fatulula ngaaka.
“Omumvo nguka iitopolwa yokonooli Omusati, Oshana oshowo Zambezi oya li ya hanagulwa kefundja nokonima omuloka sho gwa hulu, okwa li natago ya ponokelwa kondjala yiimuna oshowo yaantu,” ta popi ngaaka. Ta ti, omapya ogendji oga li ga hanagulwa po kefundja nokonima omuloka natango kakwa li gwa gwana opo ya likole mo sha momapya.
Ta gwedha po ta ti, omaudhigu agehe ngoka ga holoka ogo ga hingi epangelo opo lyi yambidhidhe oshigwana noshikukuta.
“Epagelo olya li lya longitha oomilliona N$9 okutembudhila omagumbo ngoka ga li ga adhika kefundja miitoplwa Oshana Ohangwena showo Zambezi,” Nandi-Ndaitwah ta ti ngaaka.
Ta gwedha po ta ti, epangelo natango okwa li lya tungu omagumbo ge li 19 kOmaheke oshowo Otjozondjupa sho kwa li ga hanagulwa po kombepo yoshikungulu.
“Iitopolwa ngaashi Omaheke, //Kharas oshowo Hardap oya kala nokupewa oshikukutu okuza 01 lyaJuni nuumvo sigo oMaalitsa gomumvo tagu ya. Iitopolwa mbyoka natango otayi ka yambidhidhwa niikulya yiimuna,’’ ta gwedha po ngaaka.
Nandi-Nditwah okwa ti, kehe ngoka a taalela onkalo tayi pula eyambidhidho lyoshikukuta na kale i ishangitha.
Ta ti omashangitho oge li metifa, ihe okwa kumagidha mboka ye na iiyemo yi li hwepo ya gandje ompito kwaamboka ye li mo mpumbwe lela.
Omupilima Saara Kuugongelwa-Amadhila esiku kwa li kwa dhimbulukiwa esiku lyokushonopalitha omaupyakadhi haga etwa kuushi twe kUukwangula moshitopolwa shaShana okwa li a kumagidha oshigwana shi longithe oshikukuta ngaashi sha lalakanenwa.
“Otandi kuma g i ndha mboka taya ka pewa oshikunakugwanithwa shokuhawaleka oshikukuta opo ye shi ninge ngaashi omalombwelo taga ti, ihe haku kalitha oshikukuta konima yekumba,” ta kumagindha ngaaka.
Ngaashi sha kala tashi tseyithwa okuza kombelewa yomupilimaminista kutya oshikukuta otashi ka topolelwa kehe ngoka a dhengwa ombunda pevi, esiku ndyoka okwa li ya topola wo natango uukalata wokuhawala oshikukuta.
Uukalata mboka okwa li wa gandjwa kwaamboka yi ishangitha oshikukuta.
Mboka ya pewa esiku ndyoka otaya ka longitha manga okakalata ongoshiholelwa opo ku talike nkene tau longo, nonando ayehe otaya ka topolelwa.
vkaapanda@nepc.com.na