WINDHOEK – Epangelo, okupitila moohahende dhalyo Ed Marondedze ta kwathelwa kuSolomon Kanyemba ohela olya pula omupanguli mOmpangu yoPombanda Christi Liebenberg a gandje egeelo lyondholongo kominista onkulu yelongo Katrina Hanse-Himarwa.
Hanse Himarwa okwa li a monika ondjo komupanguli Liebenberg sho a longitha ombelewa ye pambamabo okuyokela omundilo pehala lye sho a pingene po omadhina gaantu yaali mboka ya li ye na okumona omalukalwa moprograma yepangelo yoMass Housing naamboka yofamili ye moMariental.
Sho a gandja etompelo lye kutya omolwa shike a hala omunapolitika nguka a pewe egeelo ndyoka, ohahende yepangelo Marondedze okwa ti osha li oshiningilawina, naHimarwa okwa li e shi shoka ta ningi sho a gandja elombwelo pu ningwe omalunduluko momusholondondo gwomadhina oshoka okwa li a kuutumba koshipundi shi na oonkondo. “Osha li ewuliko lyoonkondo lyoshiningilawina,” ta dhenge omuthindo ngaaka.
Ta tsikile kutya aantu ihaya lopota iiningwanima yokulunga nokwiitapula we oshoka oya tala okakomosi hoka taka lwitha uulingilingi kaake na nando oonkondo dha sha noha ka tala unene kwaamboka yaashi aanamadhina, ashike oshipotha shika otashi vulu okukumika aakwashigwana ya lopote uulingilingi oshoka ngashingeyi ngoka a kwatwa oamupadhi omunene.
Omukalelipo gwopaveta gwanakumonika ondjo, Sisa Namandje okwa li a pula ompangu yi gandje egeelo lyiifuta yooN$35 000 nenge oomwedhi 12 dhondholongo ndhoka tadhi dhimwa po. Marondedze okwa ti shika omashendjo shapo oshoka egeelo ngandyoka otali haula oshipotha shika. Ta ti oshipotha shika osha kala miikundaneki nangele okwa pewa egeelo a fute nena otashi gandja ethano kutya aazeko otaya vulu ashike okufuta uuna ya kayula onyanga.
Shi ikwatelela kuMarondedze, Himarwa oku na okupewa uusama negeelo enene oshoka oye a li omukalelipo gwepangelo moshitopolwa shaHardap, a tulwa po nelalakano lyokugamena edhina noshipala shepangelo ashike okwe shi kwata noongilishi. Ta ti egeelo olyi na okweendela pamwe nongeyo yaakwashigwana nompangu oyi na oshinakugwanithwa shokugamena ethano ewanawa lyepangelo momeho gaantu aayehe.
Namandje ta ti kadhi shi dhoshili kutya okwa fa kee shi kutya okwa longa oshilonga oshiwinayi. Ta ti nonando a kala nokwiimemeha, okwa thitikinina mo omayiyuvo galwe.
Ta ti Hanse-Himarwa okwa kanitha iimaliwa oyindji niiyemo wo sho a li i ikutha miilonga onga minista shoka sha li sha kulula ondjambi ye nayi, ye natango oku na iifuta yopaveta woo.
Namandje okwa li u ulikile ompangu kutya Himarwa oku na iifuta yoohahende yoomiliona N$1,4, ashike mwaambyoka natango omu na konyala N$840 000 inaaga futwa.
Namandje ta ti nonando aakwashigwana aluhe haya kala yah ala aantu ya pewe omageelo, ompangu nayi gandje egeelo ndyoka tali tsu kumwe nooveta.
Namandje ta ti wo Hanse-Himarwa okwe mu pula a gandje etumwalaka lyegandjombili nokwiipa ombedhi noku li a taamba ko etokolo lyompangu. Ta gandja wo ombili kaakalimo yomoshitopolwa she noshilongo ashihe nokupula a dhiminwepo. Etokolo lyegeelo lyompangu otali ka ningwa momasiku 31 Juli potundi 10h00 yongula.