OSHAKATI- Omuprima woshilongo Elijah Ngurare okwa ti osha fimana ngeenge epangelo ta li twikile okuyambidida ovanangeshefa molwashi otashi kwafele eengeshefa davo dixume komesho.
Edi Ngurare okwe di popya Etitano mOshakati pefimbo kwa li a shakeneka ovanengeshefa va dja moshitukulwa shaShana.
Ovanangeshefa veendodo da yooloka okwa li va hafa okushakeneka omuprima omo kwa li tava topolafana omayele nokulombwela omupilima omaupyakadi avo.
Omutumba ou okwa li wa unganekwa kuNgoloneya woshitukulwa shaShana Hofni Iipinge nelalakano lokukundafana nghene ovanangeshefa tava longele kumwe nepangelo.
Ovanangeshefa okwa li va mona omhito yokupula omapulo omuprima minista.
Ovanangeshefa ova nyenyeta kombinga yomalelo eedoolopa a dopa okuyandjaneka omayakulo meedoolopa osho shi li tashi teya po eengeshefa davo. Ova nyenyeta natango kombinga yovanhu ve li meembelewa depangelo ashike itava ya kulwa nawa ngeenge tava ka konga omakwafo.
Ngurare okwa ti ovanangeshefa ova fimana molwashi otava shakeneke epangelo ondjilakati tashi pitile mokuyandja oilonga koshiwana.
“Ovanangeshe ohava futu oshimaliwa shoifendela yokongulu yepangelo ndele tashi longifwa okuyandjaneka omayakulo moshilongo okutunga eefikola, oipangelo nosho tuu,” ta ti ngaho. Okwa ti epangelo ola didilika omashongo aa taalelwa kovangeshefa ashike ole li pyakidila nokutula po omafaneko okuvayambidida.
Ngurare okwa pula ovanhu tava longele meembelewa depangelo opo va ndje omayakulo a wa kovanangeshefa ngeenge tava pula.
“Ina mu ningila ovanangeshefa okatongo. Ovanhu aveshe ove fike ashike pamwe no nande vamwe ve na eengeshefa da kula,” ta ti.
Okwa yelifa ta ti omunangeshefa keshe okwa fimana molwashi ota shakeneke epangalo ondjilakati.
“Otuna ovanangeshefa vamwe hava yambidida eefikola, okuyandja omakwafo keembelewa dookansela. Otwe mu pandula ovanangeshefa vetu,” ta ti.
Okwa kumaida ovanangeshefa opo va twikile okutopolafana omayele nokukala ve na elongelokumwe. Ngurare okwa ti osha fimana ngeenge ovanangeshefa va kula tava yambidida ovanangeshefa va shona shaashi otashi vatu omukumo wokulonga nondjungu.
“Epangelo ota li twikile okuyandja omikuli kovanhu ve na ehalo lokutota po eengeshefa davo. Ongheshefa oya fimana molwashi otai etele oshiwana oyuuyemo,” ta ti.
Okwa ti nonande ovanangeshefa va taalela omashongo ina va pumbwa okuteka omukumo.
Natango omupilima okwa ti ovanyasha ovo kwa li va ninga omaindilo oshimaliwa shokutameka eengeshefa davo otava ka tuminwa omikanda davo.
Pefimbo lomutumba ovanangeshefa ova pandula omupilima minista eshi a holoka komutumba ou shaashi owa fimana.