ONGWEDIVA – Epangelo olyi li metifa okutula miilonga ompango yokuhulitha po elongitho lyuutaksi wiipundi iheyali mboka wa tseyika nedhina seven-seaters. 

Ndhoka odha popiwa komupevikuluntu koshikando shiiyenditho, muuminiteli wiilonga niiyenditho Damien Mabengano oshiwike shika mOngwediva.  

Shika oshe ya sho anuwa oshilongo tashi tsikile nokulopota iiponga yomoondjila mbyoka hayi kwatele mo unene uuseven seater nohayi faalele oomwenyo dhaantu oyendji pethimbo limwe.

“Iihauto mbyoka ohayi faalele oomwenyo dhaantu oyendji, olundji ngele ya ningi oshiponga ihamu hupu omuntu,” ta popi ngaaka.

Ta gwedha po ta ti, aahingi yiihauto mbyoka ohaya hingilile, ihaya vululukwa, ohaya hingi iikando itatu nenge ine mesiku oondjila oonde sigo ya loloka shoka hashi eta iiponga.

Mabengano ta ti, ohaya zi oshimaliwa oshindji okufuta oomwenyo dhaantu ya hulithila moondjila.

“Ohashi tu pula oomilliona okufuta aakwanezimo yoonakusa, omwenyo gomuntu gumwe ohagu pula oshimaliwa oshindji. Otandi gandja oshiholelwa omuniilongo ngoka a si moshiponga shohauto ihe oshe tu pula oshimaliwa sha pita pomiliona yimwe, ihe natango otatu futu,” ta fatulula ngaaka.

Ta ti, epangelo olyi li pokutula oveta ndjika miilonga, oshoka iinima oyindji yi na sha nayo oya lundululwa nale.   

Etompelo ekwawo lyokuhulitha po ootaksi ndhoka, anuwa okushonopeka iikwauzigo mewangandjo, mbyoka hayi zi molwithi lwiihauto, nohayi eta elunduluko ewinayi lyonkalo yombepo.

“Omolwokunigilika ewangandjo nelunduluko lyonkalo yombepo, otatu ka vula okukondolola nokusila oshimpwiyu uupyakadhi mboka,” ta fatulula ngaaka.

Omunambelewa gumwe poshigongi mpoka okwa tsu kumwe netengenekothaneko kutya oohauto dhiipundi iheyali nadhi hulithe po okuhinga oondjila oonde, oshoka ohadhi faalele oomwenyo dhaantu oyendji.

“Iiponga ohayi holoka nale moondjila oonde omolwaantu itaaya hingi nawa, ihe nena otatu tula ishiwe omahooli pomulilo,” ta nyeyeta ngaaka.  

Oshihwepo aahingi mboka ye ye po nomukalo gumwe opo ya mone uubetsa wopokati, pamwe hwepo. 

Ta ti, okuuvite kutya oyendji otaya hingi oondjila oonde taya kongo oomboloto, ihe natango osha nika oshiponga.

“Oyendji oya tula ashike oshimaliwa koomwenyo, ihe kaye na noomwenyo ya humbata miihauto yawo,” ta popi ngaaka.

Shuutheni Kamati ngoka ha hingi oondjila oonde nohauto ngandjoka okwa ti ita tsu kumwe netengenekothaneko lyepangelo.

“Otatu kondjitha ondjala nokwaa na iilonga, ishewe epangelo otali tu etele ondjala, oya hala shike naanaa, oya hala tu ninge ngiini? Ta pula ngaaka.

Ta ti, edhiladhilo ndyoka itali kandula po uupyakadhi mboka taya popi, ihe otali eta uupyakadhi wokwaa na iilonga.  

Omuhingi goondjila oonde, Silas Petrus okwa ti shoka epangelo tali tengeneke, osha puka oshoka otaya undulilwa momapandaanda.

“Otatu ka lya peni, nenge otaye tu pe iilonga yimwe yokuhinga? ta pula ngaaka.

Ta gwedha po ta ti ngele epangelo olya hala aanyasha ya ka ninge oonyala oonde nokukuutumba momagumbo osho naya tokole po shoka.

Ta ti, oshike itaaya pewa ashike oondjindikila nomangambeko, kutya lungapi ye na okufelefula mesiku nenge konima yomasiku, oshowo ponkatu ye na okuhingila. 

Omwedhi gwa yi aantu ye li omugoyi oya hulithile moshiponga shohauto pokati kOtavi nOtjiwarongo sho ohauto yiipundi yi li iheyali ya li ya umbata aantu yaheyali yi idhenge omutse mumwe nohauto yoFortuner. 

-vkaapanda@nepc.com.na