ONGWEDIVA – Ondoolopa yaNgwediva osho wo yaShakati odha taalela eshongo lyiimuna tayi ende nokupashiyona mokati koondoolopa, oshinima shoka tashi vulu okweeta iiponga.
Ongwediva nOshakati odha dhingolokwa komikunda, niimuna ohayi zi komikunda hoka tayi taakana, tayi ende sigo opondingandinga yoondoolopa ndhoka. Iimuna oyindji ohayi monika uusiku nomutenya tayi taaguluka oopate, tayi li omapakete osho wo iinima ya ekelwahi momatoto ge li moondoolopa. Aakalimo yomoondoolopa ndhoka osho wo aahingi yiihauto, oya kala nokunyenyeta komalelo goondoolopa kutya iimuna ohayi tondokele moopate omanga taya hingi, shoka shanika oshiponga.
Omuhingi gotakisi Sam Ekongo okwa ti, mongashiingeyi oya itaala kutya ohaya topolelathana opate niimuna. “Otatu ningi ngiini ngele otatu lopota kwaamboka ye na okukandula po uupyakadhi mbuka, ihe kapu na shoka tashi ningwa po?” Ta nyenyeta ngaaka. Ekongo okwa ti, otaya indile ashike ooyene yiimuna ya kale taya kongolola iimuna yawo noku yi edhilila kuyele. Ta ti, unene ethimbo lyuusiku ohashi kala sha nika oshiponga. “Otatu ka kanitha oomwenyo dhetu. Haatuhe hatu mono ko nawa uusiku,” ta ti ngaaka.
Omugandji gomauyelele melelo lyondoolopa yaNgwediva Ottilie Shingenge okwa ti, oya kala nokukumagidha oshigwana shi kale aluhe tashi kongolola iimuna yasho opo kaayi thike moondoolopa ihe shika inashi pondola sha.
“Imuna tayi ende mokati kondoolopa ohayi eta iiponga, kashi li nando omondjila,” ta nyenyeta ngaaka.
Elelo lyondoolopa lyOshakati olya kala nonkalo ndjoka ethimbo nuule. Sha ikolelela komushangwa gwa pitithilwe kelelo lyondoolopa yaShakati, ondoolopa oya dhingolokwa komikunda, onkene iimuna ohayi tondokele mondoolopa sho tayi kongo iikulya.
“Out na aahingi yiimuna, mboka haya hingi mo iimuna mondoolopa, taya fala koshigunda shetu, hoka iimuna hayi futilwa ko opo tu yi mangulule. Ashike otwa taalela uupyakadhi wokufutitha aakulupe iimuna mbyoka uuna twe yi kwata ko,” ta popi ngaaka.
Ya ti, oyindji oyaakulupe, ihe okufutila ko iimuna mbyoka ohashi kala uupyakadhi shoka hashi ya dhigupalele ishewe, oshoka ohaya kala ye na oshinakugwanithwa shokupalutha iimuna mbyoka, omanga yi li moshigunda shamuni.
-vkaapanda@nepc.com.na