Omutoolinkundana
ONGWEDIVA – Nonande omupresidente gwoshilongo a igidha kutya oshilonga ashihe nashi pate, naantu naya kale momagumbo, onkalo mOshitopolwa shaShana oyi li owala ngaashika ya kala, unene kaakwashigwana mboka taya ende owala pwa fa kaapu na oondjindikila dha sha.
Omapandaanda moondoolopa, unene oondjila oonene mOshakati, Ongwediva nOndangwa, onkene ga udha aantu taya ende owala ya manguluka, kutya nee okolupadhi nenge oye li miihauto. Nonande opu na iihauto yaapolisi tayi monika tayi hingwa kopate, meni lyoondoolopa kamu na omayinda gopolisi taga thikameke aantu –ngele oyokolupadhi nenge iihauto.
Kakele owala keyinda ndyoka lya kala po nale pokati kOndangwa nOngwediva, aantu otaya ende owala memanguluko, yamwe nokuli otaya ende ye li momangungo.
Onkalo yopomahala omanene gomangeshefelo, ano pooshoping centre neemall, nayo oyi li owala ngaashi ya kala. Aantu oye li shili momikweyo sho ya tegelela okuya moositola, ashike nonatango onkene dha udha aantu. Kapu na naanaa eyooloko pokati konkalo ndjoka sho oshilongo sha li sha pata ombinga yimwe nethimbo nangashiingeyi sho sha pata thiluthilu.
Deputy Commissioner Hilya Haipumbu gwOpolisi mOshana okwa ti opolisi otayi longo iilonga yayo, ashike oshigwana ina shihala okuuva ko omalombwelo.
Haipumbu ta ti aapolisi ya waiminwa kaakwiita kohi yoshinyangadhalwa shOperation Namib Desert omo ye li moshitopolwa.
“Otatu kondjo, ashike oshigwana inashi hala okuuva ko. Otwa tula po omayinda kondje yondoolopa, hoka tatu tala nokushunitha mboka taya ende kaaye na omapitikilo.
“Shoka oshigwana shi na okutseya osho shoka kutya ocorona oshinima shoshili, nosha nika oshiponga. Aantu naya iyuthe komalombwele, naya kale momagumbo,” Haipumbu ta londodha.
Ta ti onga aaleli yokutula po oveta nelandulathano moshitopolwa otaya ka kuutumba ishewe, ya tale kutya otaya nkondopeke ngiini oshinyangadhalwa shawo, nokusa oshimpwiyu kutya elandulathano ndyoka lya tulwa po olya landulwa.
Ashike Haipumbu okwa kunkilila kutya opolisi itayi ka idhidhimikila nande aantu taya endeanda, itaya landula omalandulathano ngaashi ga tulwa po.
Ta ti oshimaliwa shegeelo lyokuya kondje yoveta yepato osho oN$2000. “Tse katu na nee, kutya oto landitha omatama nenge oonyanga, nenge oto landitha otombo, ngele otwe ku adha ou na owala okufuta oN$2000. Ngele oto ende ihe ku na omukanda gwa yela ngoka gwe ku pa uuthemba wokuza pehala limwe u ye pekwao, kala u shi kutya owa ya kondje yoveta.
“Oshigwana nashi idhidhimike, kaku na omasiku ogendji, ethimbo ndyoka lya gandjwa lyokukala komagumbo efupi,” Haipumbu ta ti ngaaka.
Oshiwike sha za ko Presidente Hage Geingob okwa tseyitha kutya oshilongo ashihe paife otashi pata, nesiku lyepato olya tamekele ongula onene yOlyomakaya ga zi ko, sigo okomasiku 04 Mei 2020. Geingob okwa tseyitha wo kutya oongamba dhoshilongo dho otadhi ka patuluka momasiku 05 Mei 2020, sha hala okutya okuza mesiku moka, Namibia ota ka patulukila aatalelipo, nAanamibia otaya vulu oku ka talela po kondje yoshilongo. Etokolo lyokupata oshilongo olya li lya tulwa miilonga lwopehulilo lyaMaalitsa, niitopolwa Khomas nErongo oyo owala ya li ya patwa. Ashike okuza Olyomakaya, oshilongo oshihe osha pata. Sha hala kutya oshigwana okwa tegelelwa shi kale momagumbo, naaniilonga yopaulumompumbwe, ngaashi ya tothwa mo kepangelo, oyo ashike kwa tegelelwa yi inyenge. Aakwashigwana ooyakwao okwa tegelelwa owala ya ze momagumbo gawo ngele ye na uudhigu tau vulu oku uvika ko, wa kwatela mo oku ka landa iikulya poositola dhopopepi, okuya koshipangelo nenge koosa, nayikwao yilwe.
Mboka ye na omaudhigu okwa tegelelwa ya ka konge oombapila kopolisi ndhoka tadhi ya pe uuthemba wokwiinyenga.