I Kae Matundu-Tjiparuro
OTJOMUISE
Okombomi, Okovimburu no Kalkpana mEpukiro na Tjovazandu na Listera mOtjombinde ovirongo vyarwe mozoresevate mOrukondua rwa Maheke mbyakuramenwa ondorera o NamPower tjimapeya aikondo orutjeno rwayo.
Oritjavari o NamPower yakondere orutjeno mOnderombapa tja Mongua pendje naindo ro kirinika. Orata yOkarukondua kOmatoororero ka Mongua, Ervin Uanguta, wayauzire kutja otjiperi kutja Onderombapa tjazeerwe kuzema. Watjere otja konduvasaneno pokati ko NamPower no Tjirata Tjorukondua rwa Maheke, otjirata katjina omerizirira worutjeno movirongo mbiheri ovirongo mbyatjama kuhuro tjinga ourizirira imbwi auri wo Ministeri yOzongoporo nOviyakise. Posyo o Ministeri indji itara tara kourizirira wayo imbwi. Munao otjirata otjitjerihenunine mourizirira imbwi.
O New Era inondjiviro yomatjangwa wotjirata ngatjatjanga mu Kambundu ko Tjirata Tjondjevero yOrutjeno, o Electricity Control Board, ousupi o ECB, okuyarura orutuu rousemba womahandjauriro worutjeno komatutiro inga morukondua ko ECB. Omieze vitatu okuza komatjangerepo worutuu indui nduatjanguwa tjiyari 6 ku Kambundu, Otjirata tja Maheke, otjimatjiso kutja tjatuapehi ourizirira imbwi. Okutataimba okutja omomautiro wa Katjose.
Otjina ihi ongendo kOtjirata tja Maheke nai tjitjipaha okuhakaena notjiuru tjehi, Hifikepunye Pohamba, okumutjivisa ouzeu imbwi. Posyo ngunda katjiyapewa okaruveze iyomberoo yo Presidenta okuhakaena kunayo.
Ovirongo vyarwe mbimapeya avitunwa iyomakondero worutjeno inga o Netso, Otjaka, o Drimiopsisa nEpukiro rOvatjawana. Makuzu Otjiarata tja Maheke katjina omasa nomasorero wotjimariva nawina wounongo wokuhandjaura orutjeno komaturiro inga. Inga omaturiro ayehe mozoresevate pendje novirongo mbyatjama kouhuro Otjirata mutjina omerizirira wokuhandjaura orutjeno. Munao Otjirata tja Maheke oputjeripurira okuyarura orutuu rousemba wokuhandjaura orutjeno mozoresevate ko ECB.
Otjiuri tjOmarandisiro nOmahakaeneno tjo NamPower, John Kaimu, wayauzire kutja otjotjiri Omandaha o NamPower yakondere orutjeno mo Drimiopsisa, o Netso nOnderombapa pendje nopo kirinika mena rokutja karusutua.
O New Era yazuva kutja pena ombata poo omaumbasaneno wesasa ngahingi orure pokati ko Ministeri yOzongoporo, o Ministeri yOmananeno wOtukondua Nozongomainde, Omakwizikiro wOmara nOmekurisiro wOkozombanda no NamPower kutja orutu rune nduna omerizirira worutjeno indui. Nandarire kuza ombata nomaumbasaneno wesasa inga ongawombisa orutjeno moresevate. O Ministeri yOnzongoporo ipatasanisa kutja peno ombata.
“Tjipasembamisiwa otutu otuhandjaure torutjeno motukondua, o NamPower otjiyerinanununa motjiungura tjorutjeno moma mumuna otutu itui. Munao o Ministeri yOviyakise otjiyasewa notjiungura tjorutjeno romasa wopokati nowokehi,” o Ministeri yatja nao momaziriro wayo nguyahinda ko New Era.
Tjingetjo oyo yapatasanisa kutja ombata indji ondji wombisa orutjeno moresevate ya Maheke. “Kawatjiri pupetapi. Otjiungura tjikayenda komurungu nandarire kutja penouzeu pokati kOtjirata tja Maheke no NamPower okutuako omunwe kembo komazuvasaneno womayandjero worutjeno movirongo ozongoze novyungurisiwa vyorutjeno muvya manuka okuungurwa.” Kaimu kotjina ihi waziririreko nainga: “Orutjeno ngunda aruhiya hita pasere okutuwa omunwe kembo kOmazuvasaneno wOmayandjero wOrutjeno pokati ko NamPower nOtjirata tjOrukondua. Omazuvasaneno inga, muvyarwe ovingi, yetuapo otjimariva tjovyungurusiwa, pendje naitjo tjorutjeno omundu auhe ndumaungurisa nu ndumaso okusuta omwini. Munda imbo wayo o NamPower orutuu romazuvasaneno inga yahinda ozombura ndakapita kOtjirata okutuako omunwe kembo posyo ngamba katjiyatjita nao nu ihi otjitjawombisa orutjeno.”