Lasarus Hakwaake
OSHIDUTE – Ohamba yOvakwanyama Meekulu Martha Christian Mwadinomho yaNelumbu okwa nangeka Tatekulu Ernest Nghidinwa onga Elenga lakula lediko Oshidute mOshikandjo Oshikunde. Enangeko eli ola ningwa ashike konima yomafiku ashona eshi oshipambu shimwe shOvakwanyama sha ninga omunyanyo sha hala ohamba i kale ya fiya po ouhamba moule womafiku 30, oshoyo oilonga yeembelewa , omadiko, oikandjo nomikunda pamifyuululwakalo ngeno i kale ya yeekwa mangha.
Moshipopiwa shaye penangeko Meekulu Mwadinomho okwa lombwela oshiwana kutya oinima ei tai linyenge moshiwana omafiku aa ove yuudite ngoo, okwa kunghulila oshiwana shi kale sha yombama noshi lineekele movaleli vasho vopamifyuululwakalo. Okwa yelifila oshiwana kutya kapena oilonga yopamufuuululwakalo paikandjo, pamadiko, pamikunda oshoyo pauhamba ya kale kwa, otai pula komesho ngaashi sha kala kapenasha shimwe shaiwa moshipala. Nonande kwa ningwa omunyanyo wa twalwa kuNgoloneya woshitukulwa Ohangwena omafiku aa atalala, Meekulu okwa ulika kutya osho inashi va hanga natango shaashi ehololomadiladilo inali ukifwa kouhamba. Okwa kwashilipaleka kutya elelo ota li kanyamukula ngoo ngeenge la pulwa pefimbo lawapala.
Meekulu Mwadinomho okwa nangeka Ernest Nghidinwa onga elenga lediko Oshidute olo la kwatelamo omikunda ngaashi Oshidute omo eli mwene womukunda, Oininive, Omupanda, Omwii, Ohakafiya, Onamundidi, Ohenghono, Epasha oshoyo Ondwi. Omikunda adishe odo oda wila mewiliko lediko Oshidute noixokolola oshoyo oikumunghungu oshoyo omikundu adishe domikunda dina okutopokononwa mediko Oshidute melelo laErnest Nghidinwa.
Ernest Nghidinwa noitya yaye mwene okwa ti okwa tambulako oshinakuwanifwa shomikundu doshiwana nomutima aushe, okwa ti okwe li yandjela oku tumba nokukokolola omikundu doshiwana, elikolelela koshipopiwamayele kutya “ngeenge ito shi dulu shi koka ngeenge oshile shikokolola. Otati kutya oshinakuwanifa eshi oteke shi pondola shaashi otaka kendabala a ka tulepo omakwatafano mawa noshiwana, noku yakula ovanhu aveshe shi fike pamwe.
Etumwalaka laye koshikandjo, kediko oshoyo koshiwana ashishe oleli kutya; ota indile oshiwana shi kale shina ohole youmwainafana, shi kale nombili noku kala tashi dulu oku diminafanapo ngeenge sha ningafana nayi shaashi ombili ohai tungu oshilongo yo ohai fufile ondumba inene yomatimba. Okwa dimbulukifa yo oshiwana kutya ka ku na omuleli a kala ena oukwatya tau wapalelele ovanhu aveshe. Onghee nee oshiwana osha pumbwafana, osha pumbwa oku li didimikila omaulili avo vene oshoyo ovaleleli vavo. Okwati ka kuna omunhu monghalamwenyo a yela ngaashi eyi, keshe umwe oku na ngoo okanongo Kaye mwene. Okwa ti okuna omukumo nelineekelo la pama kutya, paku etapo omakwatafano noku udifa oshiwana shi kale nohole onga omunhu namumwaina otashi ke mu kwafa unene opo a tungepo oshiwana shi na ombili.