Oshikondo shuundjolowele nuuhaku wiimuna moshitopolwa shaMusati osha koleke omukithi tagu dhipaga iingulu moshitopolwa ngoka, nogwa dhipaga nale iingulu 61 muule wethimbo efupi.
Ndohotolola onkuluntu yiinamwenyo moshitopolwa shoka, Josephat Peter, okwa koleke onkundana ndjoka ta ti kutya omukithi ngoka ogu li omudhigu noonkondo notagu dhipaga mbala.
Peter okwa hokolola kutya oshingulu shotango osha si komukithi ngoka, momasiku 17 Maalitsa, nosha li sha lopotwa koombelewa dhawo opo nduno ya kuthe ombinga ya kale ya konaakona eso lyoshingulu shoka, ihe ngashiingeyi okwa ti omukithi ogwa monika notagu ithanwa Afrika Swine Flu.
Okwa hokolola kutya omukithi ngoka ngashiingeyi ogwa kwata iingulu 194 mbyoka tayi ehama nuuwinayi womukithi nguka iingulu itayi hupu.
“Omukithi omudhipagi nogu na olutapo miingulu nohagu eta ekanitho enene mokati
kaanafaalama yiingulu. Ngashiingeyi otwa hala okutseyithila
aanafaalama nkene ye na okugamena nenge okukeelela iingulu yawo yaaha kwatwe komukithi,
oku gu dhimbulula nankene ye na okugu keelela gwaaha taandele unene,” osho omundohotola gwiinamwenyo a hokolola ngaaka.
Okwa tsikile ko kutya ngashiingeyi oshigombo shika ohashi etwa kombuto hai kwata iingulu yopaantu nohagu dhimbululwa kuuvu uunene neso lyombaadhilila.
“Omolwa uudhigu wago, omukithi nguka ogwa pumbwa okulopotwa moshilongo shetu, onkene uuna togu fekele owa pumbwa wu gu lopote koombelewa dhuuhaku wiimuna ndhoka dhi li popepi nangoye,” osho a hokolola ngaaka.
Okwa hokolola kutya aantu unene aanafaalama mboka taatekula iingulu moshitopolwa naya ninge onkambadhala yokulopota komundohotola gwawo gwiimuna opo a ninge omakonaakono ye a vule oku ku utha shono to vulu okuninga.
“Uuna omukithi gwa kolekwa kutya ogo tagu li iingulu oshaanawa okudhipaga po iingulu ayihe nokufumvika muule nenge okufika po omidhimba dhayo opo omukithi gu yelekwe po thiluthilu. Iigunda noshowo iilongitho y alongithwa nayi opalekwe noothewa dhokudhipaga oombuto dhuuvu,” ta hokolola ngaaka.
Okwa kumagidha aanafaalama mboka kutya oshiwanawa wu thuwithe po oshigunda shoye uule womwedhi omanga inoo eta mo iingulu iipe.
Okwa ti woo kutya aantu naya kotokele kutya iingulu yi na omwenyo nenge iilikolomwa yayo, (onyama,onyata noshotuu) ayihe oyi na oshiponga mokutaandeleka oshigombo shika.