■ Loide Jason
WINDHOEK-Aakalimo yomoshikandjohogololo shaRuacana moshitopolwa shaMusati oya dhimbulukwa esiku lyaantu mboka haya lumbu nuulema ndyoka lya dhenenwa poRuacana mehuliloshiwike lya ziko.
Ngoka a popitha aakalimo mbaka oye omupeviminista guuniilema mombelewa yomupevipresidente Alexia Manombe-Ncube, ngoka a popi kutya kakele kokudhimbulukwa ashike esiku ndyoka limwe lyomomalakano gokutyapula esiku ndyoka okutala konima ndele aantu taya tala kutya omashongo geni ya kala taya ungaunga nago noshowo shoka ya sindana musho momukokomoko ngoka.
Okwa ti kutya esiku lyaanuulema ndyoka hali dhanwa omumvo kehe nuumvo olya dhanwa kohi yoshipalanyolo kaleka oombelewa nomahala gaakwashigwana taga monikwa nokulongithwa kaantu haya lumbu nuulema.
Manombe-Ncube okwa ti kutya omahala noombelewa dhepangelo nenge dhoshigwana ngele otadhi longithwa kaantu ye na uulema nena shoka otashi toto po onkalo nomudhingoloko gu li nawa kaantu mboka, tashi ya kwathele nokuli opo ya iyuvithe nawa mopolitika, oohedhi nomuthigululwakalo noshowo uuthemba wonkalathano yaantu.
Nguka okwa hokolola kutya epangelo olya pondola okutuma aantu ye na uulema ye vulithe 100 komadheulo ngoka ga gandjwa koshiputudhilo shopombanda shedhina Namibia University of Science and Technology (NUST).
Nangashingeyi mbaka oya tota po oongeshefa dhawo dhopaumwene moka ye li taya mono uuhupilo notaya ningi nawa lela moongeshefa dhoka.
“Onkene okansela yuulema oya mona oolopota dhi li 38 lwaampoka dha za moshigwana niiputudhilo yopaumwene ndhoka tadhi shomononwa ngashingeyi notadhi yamukulwa mbala, e tadhi falwa momutumba gwopashigwana dhi vule oku uvikwa nawa” osho a hokolola ngaaka.
Okwa tsikile ko ta ti kutya aagundjuka ye vulithe 30 oya mona uuwanawa wokufutilwa koNSFAF omumvo gwoshimaliwa gwonuumvo, onkene aanasikola oyendji otaya ka kwathelwa mokufutilwa omayilongo gawo kiiputudhilo yopombanda.
Manombe-Ncube okwa hokolola kutya ngashingeyi opwa totwa omukalo omupe hagu ithanwa Baseline Register opo gu wape okushanga nokuyalula aantu ayehe mboka taya lumbu nuulema moNamibia , omwaalu gu kale gu li mondjila .
“Omaishangitho ngaka otaga ka kala ge li miitopolwa ayihe yi li omulongo 14 moshilongo. Taya shangwa shi ikololela komahala gawo gwolukalwa,” osho a yelitha ngaaka.