Ngoloneya gwoshitopolwa shaMusati Immanuel Shikongo ota hiya oshigwana opo shika tyapule nokudhimbulukila pamwe esiku lyemanguluko, ha li dhimbulukiwa omumvo kehe momasiku 21 gaMaalitsa.

“Ngaashi kwa tokolwa ko mu Presidente gwoshilongo Netumbo Nandi-Ndaitwah kutya esiku ndyoka otali ka tyapulilwa miitopolwa ayihe yoshilongo, otwa tokola tu tyapulile esiku ndyoka mondoolopa yOkahao,” ta popi ngaaka.

Shikongo okwa ti, esiku ndyoka ota li ka dhimbulikilwa pehala lyomauliko giipindi tali ithanwa Ehao.

Ta ti, momasiku 21 gaMaalitsa nuumvo Namibia ota gwanitha omimvo 36 gemanguluko, onkene osha simana okundjokonona shoka sha holoka ethimbo oshilongo shali muukoloni nankene sha manguluka osho wo mpoka sha thikama nena. “Esiku ndyoka hali dhimbulukiwa noku tyapulwa omolwemanguluko lyoshilongo, ohali simanekwa omolwomapendafule ngoka ga hulitha sho taga kondjele oshilongo shi manguluke osho wo okutumbaleka mpoka oshilongo sha thikama nena,” ta fatulula ngaaka. 

Omunangeshefa gwo mo kOkahao Taati Shaanika moonkundathana dhopangondhi noshifokundaneki shika okwa ti, oya nyanyukwa sho esiku ndyoka tali ka dhimbulikilwa mondoolopa ya wo. 

Ta ti, eyeto pamwe lyoshigwana otali ka xwaxwameka nokuyambula po ondoolopa ya wo pamukalo gomangeshefelo osho wo eliko lyoshimaliwa momudhingoloko gwOkahao,” ta ti ngaaka. Omushingithi gwiikulya Maria Niilenge okwa ti, shoka sha tokolwa nuumvo osha simana ku yo. 

“Etyapulo lyemanguluko otwa kala noku lyi mona ashike kooradio dhomizizimbe osho wo tali popiwa mooradio, ihe nuumvo nani ota tu li mono nomeho,’’ ta pandula ngaaka. 

Ta ti, etokolo ndyoka ewaanawa oshoka otali gandja ompito koshigwana ashihe shi tyapule nokuuva ondjokonona yaNamibia, ta gwedha ko wo kutya nayo otaya ka mona oompito dhokushingitha iinima yawo. 

vkaapanda@nepc.com.na