Esiku lyemanguluko ndyoka hali dhimbulukwa nokutyapulwa oshilongo ashihe, nuumvo otali ka dhimbulukilwa pambelewa mOutapi moshitopolwa shaMusati, pehala tali ithanwa Olufuko.
Esiku ndyoka ohali dhimbulukiwa aluhe oshilongo ashihe momasiku 21 gaMaalitsa.
Namibia nuumvo ota gwanitha omimvo 33, sho kwa li a mono emanguluko momumvo 1990.
Omumvo gwa yi okwa li lya dhimbulukilwa koshitopolwa shErongo, kondoolopa Swakopmund.
Ngoloneya gwoshitopolwa shaMusati Erginus Endjala okwa kwashilipaleke kutya esiku ndyoka otali ka dhanenwa moshitopolwa shawo, shoka tashi ka eta oompito oshowo omawunawa ogendji moshitopolwa.
“Esiku ndyoka hali dhimbulukiwa nokukutyapulwa omolwemanguluko lyoshilongo, ohali simanekwa omolwomapendafule ngoka ga hulitha sho taga kondjele oshilongo shi manguluke oshowo okutumbaleka mpoka oshilongo sha thikama nena,’’ ta popi ngaaka.
Ta ti, oya nyanyukwa sho esiku ndyoka tali ya li dhimbulikilwe moshitopolwa shawo.
“Shoka otashi ka xwaxwameka nokuyambula po oshitopolwa shawo pamukalo gomangeshefelo oshowo eliko lyoshimaliwa moshitopolwa shetu,” ta ti ngaaka.
Omushingithi gwiikulya yOshiwambo oshowo omuhondji gwiikutu paithano, Sonia Hilarius gomOutapi okwa ti, shoka sha tokolwa nuumvo osha simana kuyo.
“Etyapulo lyemanguluko ohatu li mono ashike kooradio dhomizizimbe oshowo tali popiwa mooradio, ihe nuumvo nani otatu li mono nomeho,’’ ta pandula ngaaka.
Ta ti, oshoka oondjila adhihe otadhi yi kOutapi muMaalitsa, nayo otaya ka mona ompito yokushingitha iinima yawo kaatalelipo.
Omunyasha gumwe gomOutapi Jona Shikalepo sho a li a pulwa kuKundana kutya oku uvite ngiini sho emanguluko tali dhimbulukilwa momundhingoloko gwawo nuumvo, okwa ti, oku uvite nawa shili, ihe oku na omanyenyeto.
“Ondi shi ngele tatu tyapula esiku ndyoka otu na okukala tatu tanga omauwanawa ga longwa kongundu tayi pangele? Oshindji inashi gwanithwa po nonando omimvo odhindji dha pita,” ta popi ngaaka.
Ta ti, omimvo 33 odhindji noonkondo, ihe sigo onena kolukanda Ontimbu kaku na uundjugo nomeya.
“Otatu tyapula emanguluko lyini, ngele omauwanawa otaga ningilwa ashike oohandimwe?’’ ta pula ngaaka.
Ta ti okwa hala esiku ndyoka ngele lya thikana, oshigwana shi pewe ompito okugandja omayiuvo gasho oshowo olupandu mpoka lwa pumbwa okugandjwa. vkaapanda@nepc.com.na