Esiku lyokudhimbulukwa omapendafule gekondjelomanguluko lyaNamibia ndyoka hali dhimbulukiwa omvula kehe momasiku 26 Aguste, nuumvo mOshitopolwa shaZambezi, olya dhimbulukilwa koKatima Mulilo pokapale komaudhano, mpoka Omupresidente gwoshilongo Netumbo Nandi-Ndaitwah a popithila oshigwana. 

Aaleli yopombanda mboka taya ithanwa omapendafule oya li ya thiki nokudhimbulukilwa pamwe esiku ndika. 

Esiku ndyoka lye ti 26 Aguste, ohali dhimbulukiwa aluhe moNamibia, molwaashoka omo moka ondjembo yotango yekondjelomanguluko ya topithilwe kaakondjelimanguluko yoSwapo mOmugulugwombashe mUukwaluudhi mOshitopolwa shaMusati, ye yi ukitha maakwiita yOmukolonyeki South Africa. 

Esiku ndika olya hokololwa wo kepangelo li kale esiku enene lyefudho. 

Miitopolwa yilwe, esiku ndika ohali dhimbulukiwa paikandjohogololo, ashike pashigwana nuumvo esiku ndika olya tokolwa li ka dhimbulukilwe koZambezi. 

Oshifokundaneki shika osha kundana wo kutya ookansela dhiikandjohogololo yi ili noyi ili kumwe naawiliki aakwawo yopashigwana miikandjohogololo yawo moka oya longekidha nawa okudhimbulukwa esiku ndika noya hiya aantu yawo ya ka dhane nokudhimbulukwa pamwe esiku ndika lya simana mondjokonona yaNamibia. 

Katima Mulilo nenge ku tye Caprivi okwa tseyika nawa omolwedhiginino lyomuthigululwakalo dhe, dhoka okuza pomasiku gemanguluko sigo okeluwa ndika omuthigululwakalo nguka ihagu lunduluka unene pakuyeleka noondoolopa osho wo iitopolwa yilwe moshilongo. 

Uuministeli womauyelele owa tseyitha kutya aantu omayovi okuza kiitopolwa ya yooloka oya gongala nokudhimbulukwa esiku lyomapendafule mondoolopa ndjoka. 

Uuministeli womauyelele owa ti nonando oshituthi oshinene osha dhimbulukilwa mondoolopa ndjoka yi li omuyelo okuya miishiindalongo yaNamibia, shika itashi yi moshipala iitopolwa yilwe okudhimbulukwa esiku ndika miitopolwa yawo. 

Okutala kuuyamba womithigululwakalo moshitopolwa shoka, iidhano yopashigwana okumwenyeka engungo lyaanashituthi oya dhana onkandangala esiku ndyoka. 

Omupresidente gwoshilongo Nandi- Ndaitwah okwa popi kutya esiku lyomapendafule oli na okudhimbulukiwa aluhe. “Ndika olyo esiku moka hatu dhimbulukwa nokusimaneka omapendafule goshilongo shetu ngoka ge tu tetekela nale oshowo ngoka ge li momwenyo noyi iyambela nenge ya gandja oomwenyo dhawo omolwekondjelemanguluko lyoshilongo shika,” ta ti ngaaka. Nandi-Ndaitwah okwa ti nena oshilongo shika osha manguluka nOmunamibia kehe nena ota tyapula uuwanawa woshilongo shika, ashike osha pitila moombinzi dhomapendafule ga ka lala nale naangoka gena omwenyo. 

Ta gwedha ko kutya esiku ndika otali kala esiku lya simana mondjokonona yaNamibia sigo aluhe. Minista gwetanga lyegameno nonkalo yoonakulwa aakulu Frans Kapofi esiku ndyoka okwa popi kutya otaya tyapula omauwanawa omolweyiyambo lyoomwenyo dhaanamibia oyendji. “Omapendafule oga dhana onkandangala onene okutula oshilongo shika mpoka shi li nena, onkene shoka oshi na okusimanekwa, ngaashi tatu shi dhimbulukwa nena mpaka,” ta popi ngaaka. Minista gwomauyelele nomakwatathano gopaungomba Emma Theofelus okwa pandula epangelo kutya olya gandja oompito dhelongo, uundjolowele nongeshefa oshowo oompito dhilwe omolwemanguluko lyoshilongo shika. 

“Kuyamwe oye wete kutya epangelo kali na shoka tali ningi ihe naya dhimbulukwe kutya epangelo lyoSwapo otali longo nuudhiginini ngaashi oondjila ndhoka opo dhi vule okukwatakanitha oondoolopa onene,” ta ti ngaaka. Ta gwedha ko kutya aanamibia pethimbo taya dhimbuluka omapendafule, naya dhimbuluke woo shoka sha ningwa po koshilongo mokuyambulapo oonkalamwenyo dhaantu. Kanskela gwoshikandjohogololo shOkongo Efraim Shipindo okwa ti ye ota pandula mpoka pwa thikama oshitopolwa she konima yekondjelomanguluko.“Katu na shoka kaatu na moshikandjoghogololo shetu, aakalimo yetu nena oya nyanyukwa oshoka omayakulo ogendji oga e twa popepi nayo,” ta ti ngaaka. 

Shipindo okwa ti ehumokomeho olyuuka komeho ihe otali holoka omolwa ombili nelongelo kumwe ewanawa lyili moshilongo konima omapendafule ga kondjo nokwiiyambela oshilongo shika. 

okwa pula wo aaNamibia ya dhimbuluke nokusimaneka ekondjelomanguluko oshowo okutsikila okuyambulapo oopoloyeka dhoka tadhi gandja omauwanawa kaanyasha. 

Omukalimo gomOshakati Kamati Shilongo okwa ti, ethimbo oshilongo shika shali miita okwali omushona, ashike otadhimbulukwa nawa kutya, aanamibia oyali muukoloni. “Onkene ondishi okushi hokolola nawa kutya Namibia nena okwa manguluka no tatu pandula epangelo lyoSwapo kwaashoka lyalongo nokutula oshilongo mpoka shili nena,” ta popi ngaaka. 

Laina Shuuya ngoka a ndopa ondondo 12 omumvo gwayi, okwa ti, nonando oshilongo shika oshina omauwanawa galwe oshina wo natango mpoka sha ndopa. 

Ta ti, onga aanyasha oya taalela omaupyakadhi gamwe ga pumbwa okukandulwa po kepangelo. 

-vkaapanda@nepc.com.na