Oshivike sha dja ko ovanyasha vahapu moshitunda Namibia ova li va hafa ngambishi e li meumbo mwa tomwa, eshi Omuamerica a shivika nawa Ishowspeed a talela po oshilongo. Ishowspeed oha mwenyeke komalungula noku na ovalanduli vahapu mounyuni. Kundana okwa li a ya meenghundafana noohandimwe oku va pula nghene va li ve uditile etalelopo lomulumenhu oo omunamido o20.
Laudika Shingano
Osha li ehafo linene kwaame, okumona Ishowspeed ta tavakana momapandavanda aWindhoek. Osha li yo oshiima shiwa okutala oshilongo shetu sha tulwa pombada mokaalita kounyuni, osho yo omifyuululwakalo da yooloka. Onda mona kutya Namibia oku na shihapu osho ta dulu okuulikila ounyuni. Nonda hala ovakwashiwana ava hava longo oilonga ya fa ya Ishowspeed, va tameke yo okukala hava ulike oshilongo momukalo wa tya ngaha.
Pamwenafye Hailonga
Ishowspeed okwe tu pa omhito, opo ovanailongo ava inava enda nale moNamibia va mone kutya Namibia ke fi matyatya, ngaashi ovanhu vahapu hava dilaadila. Onda pandula yo eshi a ka talela po dimwe domomifyuululwakalo dakula moNamibia, ngaashi omuhoko wOvahimba osho yo ovatilyane. Eshi tashi ulike kutya nande ounyuni wa xuma komesho, natango otu na omihoko da kaleka po omifyuululwakalo ngaashi di li, no inadi fyuulula exumokomesho lopaife.
Jenny Libongani
Eshi nda mona Ishowspeed a fika moNamibia, okwa li nde likwata pomutima kutya ota ka ulikila ounyuni shike lela komalungula kombinga yaNamibia. Onda pandula eshi a ulika omuhoko wovayelele neenghulunghedi davo. Onda pandula yo vali eshi a ulikila ounyuni kutya Namibia ke li ngaashi vo hava dilaadila. Natango onda hafa yo eshi a mona omhito yokukufa momalihafifo a ulike oshitalendi shaye, ngaashi okutondoka pauxupi.
Christophina Killian
Etalelepo laIshowspeed moNamibia okwa li linyakula neenghono, shaashi onghalo yaye oye lifa ashike naashi e li komalungula. Onda hafa shaashi okwa dula okuunganeka ovanhu vahapu veedula daye, osho yo ava hava ningi e shi hole. Okwa mona yo omhito yokutalela po okapana omo ounyuni wa mona kutya Namibia oku na ombelela yongushu yo oinyenye. Natango onda pandula yo eshi a yelifa kutya ote ya okuyandja omakwafo komahangano a yooloka moshilongo.
Victor Josef
Etalelepo laIshowspeed okwa li lela li na oshilonga, nokupatulula omesho ovakwaunyuni ngeenge tashi ya poshilongo shetu. Nonande ina talela po lela eenhele dihapu moshilongo, lo nefimbo e li a kala mo ola li lishona lela, onda pandula eshi a dula okuulika eshi a ulika po. Namibia oshilongo shimwe shi na omwaalu wovanhu vashona nonda panda shaashi otashi dulu okunana ovatelelipo ve uye va talele po oshilongo shetu. Ashike nande ongaho inandi panda olushindo, netambekido lomalaka pokati kovakwashiwana komalungulula, molwaNamibia.
