Charles Ndeumane

Etemo olya ya momupini kOshigambo High School konima sho pwa li omalimbililo kutya otashi vulika osikola ndjoka yi kale inaayi patulula oshikako oshitiyali molwomananathano ngoka ga li pokati kosilonga ndjoka nuuministeli welongo.

Omukuluntuwiliki guuministeli welongo Sanet Steenkamp okwa ti oya inika komilungu nomukuluntusikola gwOshigambo High School osho wo omukuluntu gwelongo moshitopolwa shaShikoto noya adha etsokumwe opo osikola yi patuluke. 

Shika osha landula sho osikola yaShigambo ya li muupyakadhi woshimaliwa oshikako sha zi ko molwaashoka anuwa uuministeli welongo kawa li wa hala okupa osikola ndjoka oshipambu shoshimaliwa shoka epangelo hali gandja koosikola dhopaumwene. 

Shika anuwa osha li sha ningwa sho osikola ya tidha aanasikola yaali sho anuwa ya eta ekuyunguto mosikola nomagalikano. “Onda popya nomukuluntusikola oshowo omukuluntu gwelongo moshitopolwa shaShikoto. Natango otwi ipyakidhila nokukandula po uupyakadhi mboka wa li po, ashike ponkatu mpaka osikola oya patuluka nelongo otali yi komeho,” Steenkamp a ti.

Aanasikola yaali oya li ya tidhwa momuhandjo gwosikola molwaashoka anuwa oya li taya piyaganeke aanasikola aakwawo nomagalikano gomokati kuusiku. Kwaashika Steenkamp okwa yelitha kutya etidho lyaanasikola mboka mosikola olya li ashike egeelo lyopakathimbo. 

“Omukuluntu gwelongo oye ashike e na uuthemba wokutidha aanasikola mosikola, ashike omukuluntu gwelongo moshitopolwa shaShikoto ina tidha aanasikola mboka mosikola, oya li ashike ya pewa egeelo lyopakathimbo kosikola oshoka oya li taya yi eilongo lyaanasikola aakwawo moshipala. Kapu na omunasikola e na uuthemba wokuninga iinima tayi piyaganeke yakwawo,” osho Steenkamp a popi.

Omulongithi gwomalungula gumwe okwa gandja uusama kuuministeli welongo sho anuwa wa li inaawu hala okukwathela osikola ndjoka molwaashoka ya tidha aanasikola mboka inaaya iyutha koompango. “Otwa pumbwa okukala hatu landula oompango ndhoka twa tula po, oshinima sha tya ngiini osikola yi na oompango ndele aanasikola ihaya iyutha kudho?” Osho a shanga ngaaka koFacebook.

Omulongithi gwomalungula omukwawo naye okwa holola inaa tsa kumwe netokolo lyosikola lyokutaambulula aanasikola mboka, okwa shanga koFacebook ta ti, “Aanasikola oya tidhwa mosikola molwaashoka inaaya iyutha koompango dhosikola. Oya li taya kudhile poowili ndhoka yakwawo ya kotha medhina lyongeleka yoshiveva, ongoshizemo aanasikola oya li yi iyadha taya kotha pethimbo lyootundi. Ashike ngiika shaashi aavali yaanasikola mboka ya li ya tidhwa mosikola oye na omahewa moombelewa oonene oya kwatathana noohahende ndele eta ya ningile osikola omatilitho gopaveta shaashi anuwa aanasikola oye na uuthemba weitaalo nokwiinyongamena”.

-mrndeumaneraycharles@gmail.com