Auleria Wakudumo 

Epangelo okupitila mouministeli wounamapya nounaimuna, eeshi, omeva nomatalululo omadu otali twikile okuwanifa po omaudaneko okuwedela nokuyambula po oproyeka yoikulya momukunda Ekoka moshitukulwa shaHangwena. 

Ouministeli owa hovela okumboola eemboola okudja mo28 Oktoba nova teelelwa va kale va mana mo20 omwedi ou. 

Omupopiliko mounisteli wounamapya, Simon Nghipandulwa okwa holola kutya ouministeli owa fa omboola yotete oyo i li medu oule weemeta 180. Okwa ti omboola ei oya kwatafana nomunino womeva wakula, Ohangwena 1 aquifer neemeta 151. 

“Elalakano okukwatakanifa eemboola doshikunino shounamapya kominino domeva dOhangwena aquifer 11 odo dili oule weemeta 200-400 medu koshi yomunino wotete,” Nghipandulwa ta holola. 

Okwa ti eshi oshili elalakano lakula louministeli wounamapya okukwashilipaleka kutya keshe oshitukulwa otashi longo oipalwifa yasho opo ku kandulwe po ondjala nokuninga Namibia oshilongo osho inashi li kolelela kusha ngeenge tashiya mokulonga oikulya. 

Omukulunhuwiliki mouministeli Ndiyapuki Nghituwamata okwa li a talela po oshikunino shounamapya mEkoka pamwe novanambelewa muAguste. Nghituwamata okwa li a holola kutya ouministeli waye otau ka wedela ko koproyeka younamapya. 

Oproyeka younamapya yEkoka oina oule weehecta 140. Ovanambelewa ovali va nhuninwa okuninga omakonaakono edu op ova tale opo tapa okutulwa eemboola domeva odo tadi ka kwafela okuandjaneka omeva moproyeka oyo naapa tava dulu okuxupa. 

Okwa holola yo kutya oproyaka inai teelelwa ashike i yandje oipalufa koshiwana ashike otai ka yandja yo oilonga nokukwashilipaleka kutya ovakwashiwana vomomudingonoko ova mona ouwa uhapu ngaashi okumona oikulya osho yo oilonga. 

Ouministeli owa katuka onghatu ei she likolelela keifano lOmupresidente Netumbo Nandi-Ndaitwah eshi a pula oikondo yepangelo osho yo yopaumwene i longele kumwe okufinda ondjala moNamibia. 

Nghituwamata okwa ti ouministeli otau ka kala u na eeproyeka dounamapya moitukulwa aishe 14 yoshilongo opo va kwashilipaleke kutya keshe oshitukulwa otashi findi ondjala, okuyandja oilonga nokuyambulapo ovakwashiwana vopomudingonoko osho yo oikulya yoshilongo. Okwa holola kutya edu oli li koshi yelelo louministeli wounamapya nohali longifwa okukwafela ovakwashiwana vovayelele vopomudingonoko noipalwifa. Nghituwamata okwa pula ovanambelewa ovo tava ningi omapekapeko opo va endelele opo oproyeka iha yiwe moshipala ile i kwate efimbo lile inai tamekwa. 

“Ohandi indile yo ovakalimo vomEkoka opo va longele kumwe mokuyandja ekwafo koproyeka ei shaashi otai va etele ouwa uhapu,” Nghituwamata ta ti ngaho. 

-wakudumoauleria@gmail.com