OHANGWENA – Ovahongi vokOnaakale Combined School ova lombwela Kundana kutya etete hali telekwa keshe efiku pofikola ohali undulile ovanafikola kofikola opo va dule okulihonga.
Ofikola yaNaakale i li moshitukulwa shaHangwena oi na omwaalu wovanafikola ve li 410, navahapu ihava faula nande olo efiku molwokatete aka hava li keshe efiku pefimbo loshitumbetango.
Omukulunhu wofikola Saino Sheefeni okwa ti opologalama yetete pofikola oya kala tai ende nawa oule wefimbo, nohashi nane ounona vahapu va holoke keetundi shaashi mutu ngeno kapwa li etete ngeno ohava longo ashike oipundi.
“Vahapu vomovanafikola vetu ohava di momaumbo a nyika oluhepo novakulunhu ovaha longo lela noudjuu opo va wanife po eemhumbwe davo. Ovadali vahapu ihava longo, nomomaumbo avo ihamu kala oikulya lela. Vahapu ohava kufwa nee koshi kokatete shaashi ondjala ohai kala tai nanene lela,” Sheefeni ta yelifa.
Nonande ounona ava vati tava mono oixuna eshi moumambo muhe na oikulya voo tava ende oinano ile okuuya keetundi, natango ohava kendebala yoo ngeenge tashi ya poilonga yofikola.
Sheefeni okwa lombwela yoo Kundana kutya natango omudingonoko wavo wofikola owa pumbwa evatelo unene tuu ngeenge tashi ya peengulu shaashi ounona ohava longwela moipeleki ya kulupa.
Okwa twikila yoo kutya nonande ounona hava hongela momudingoko tau shongola nowa pumbwa eyambidido, inava shakenena naana omwaalu ngeno u hadi wounona tava efa ofikola.