Charles Ndeumane
Epangelo olya gandja oshimaliwa shoomiliyona N$365 kuumimisteli wiikwamina niikwankondo opo ondando yolusheno kaayi gwedhelwe ngaashi kwa li sha thanekwa.
Epangelo lyaNamibia olya tula oomiliyona N$365 poshitaafula opo li tsakaneke aalongithi yolusheno ondjilakati mokufuta olusheno.
Ehangano lyi na sha niipambele yolusheno moshilongo hali ithanwa Electricity Control Board (ECB) okwa li lya thaneka ondando yolusheno yi gwedhelwe noopelesenda hetatu. Ethaneko ndyoka olya li lyi na oku tulwa miilonga mesiku kyotango lyaJuuli 2024, ashike ethaneko ndyoka itali ka tulwa we miilonga.
Omunambelewa omukuluntu gwehangano lyo-ECB Robert Kahimise okwa popi pethimbo lyoshigongi shokugandja omauyelele kiikundaneki kutya ethaneko lyokugwedhela ondando yolusheno itali tulwa we miilonga.
“Sha landula omakemo goshigwana kombinga yondando yolusheno, minista gwiikwamina niikwankondo Tom Alweendo okwa kwatathana no-ECB opo ya tale komakemo gaalongithi yolusheno, sho osho nee sha eta opo epangelo lyi yambidhidhe aalongithi yolusheno noshimaliwa shoomiliyona N$365 momayalulilo gokomvula 2024 sigo 2025, sha hala okutya uule womvula okuza mesiku lyotango lyaJuuli 2024 sigo 31 Juni 2025,” Kahimise a ti.
Aalongithi yolusheno oya pandula epangelo molwoshimaliwa shoka lya gandja opo lyi ngambeke egwedhelo lyondando yolusheno molwaashoka andola aantu oyendji oya longa nuudhigu oshoka onkalo yomahupilo otayi nyengana nale.
Aahwahwameki oya adhika yi ilongekidha okuninga omahololomadhiladhilo ge li ompinge netokolo ndyoka.