Minista gwiilonga niiyenditho John Mutorwa okwa li a holola ongeyo sho a li a talele po ongalashe yepangelo mOndangwa Etitatu.
Ta ti, shotango ehala olya nigila, itali hokitha nando, oshowo olya kalelwa kiihauto oyindji ya pumbwa okupangelwa yo yi shune hoka ya za yi ka longe iilonga yepangelo.
“Onda talele po oongalashe dhimwe moshilongo okuza omumvo gwa yi, ihe onda mono kutya uupyakadhi wa kalitha oohauto dhepangelo moongalashe owa faathana ashike, nowa pumbwa okukandulwa po meendelelo,” ta popi ngaaka.
Ta gwedha po ta ti, sigo oompaka, okwa ndhindhilike kutya uupyakadhi owu li kaanambelewa aanene kOvenduka hoka oko haku zi omapitikilo opo iihauto yi pangelwe oshowo okutuma oshimaliwa opo iitenda ya pumbwa okulandwa yi landwe.
“Ethano oshowo iilonga yoongalashe dhepangelo oshilongo ashihe kali shi ewanawa. Iihauto oyindji ya thikama mpaka kayi na uupyakadhi uunene,” ta nyenyeta ngaaka.
Minista esiku ndyoka okwa li a pula omatompelo kaakuluntuwiliki mongalashe moka, ngoka ga kaleka po oohauto ndhoka tadhi pi ashike omutenya omanga dha pumbwa okulonga.
Mutorwa okwa ti, koRundu iihauto yi li 83 ya kankamekwa pongalashe yepangelo.
Omukuluntuwiliki oshowo omukwatelikomeho gwongalashe ndjoka mOndangwa Aron Amakali okwa li a totha mo omaupyakadhi ga kankameka iihauto yepangelo pongalashe mpoka.
Ta ti, oya taalela omaupyakandhi ogendji ngoka ga pumbwa okukandulwa po kepangelo, Iihauto yi li 378 oya kalela ongalashe mOndangwa.
“Iihauto mbyoka ya thikama mpaka oyi li moongundu dha yooloka, yimwe oya thikama oshoka kapu na shoka shi na okutulwa ko, yimwe oya tegelela okulandithwa po, yimwe omikanda dhawo dhokuhinga odha felefala omanga dhimwe odha mona iiponga iinene,” ta hokolola ngaaka.
Amakali ta ti, natango oya taalela uupyakadhi wiilongitho, nonando oya ningi omaindilo giilongitho ohashi kwata ethimbo ele unene opo yi thike pongalashe ya shuwe okutsikila iilonga yawo.
“Natango out na uupyakadhi waanilonga, aanilonga inaya gwana pongalashe okugwanitha po iilonga ayihe. Unene otwa pumbwa aanambelewa, aahingi oshowo aapangeli ya gwedhwa po,” ta indile ngaaka.
Omuniilonga gumwe okwa ti, uupyakandhi mboka otau hulu ashike uuna omatokolo taga kala taga ningwa pongalashe popwene.
“Aanambelewa yokOvenduka oyo taya shunitha iilonga yetu monima, oshoka ohatu lombwelwa ashike kutya uusilepa inau futwa,’ ta popi ngaaka.
Ta ti, minista mpoka na tale po nawa, iilonga ayihe nayi longwe ashike pongalashe.
Ongalashe ndjoka ohayi kwathele oohauto adhihe dhe pangelo dhuuministeli wa yooloka miitopolwa ayihe yokonooli.