Elelo lyondoolopa yaNdangwa ota li hiya oshigwana shi ninge omaindilo gomahala gokuulika iipindi ya wo.

Omauliko giipindi ngoka taga ningwa  oshikando oshi-12 otaga ka kala ko okuza momasiku 27Juni sigo 05 Juli nuumvo.

Omunambelewa gwiipambele yoshigwana nomakwatathano melelo lyondoolopa yaNdangwa Petrina Shitalangaho-Mutikisha okwa ti,  oofoloma odha pita nuutala owuna oondando dha yooloka.

“Uutala womahangano omanene tau kala meni lyetungo owu na N$3000, mboka tau kala mewawa lyetungo N$2200 omanga wopondje wu na N$N2000. 

Okatala kiikulya niikunwa N$2500 omanga kiinima yilwe pondje N$800.00,” ta fatulula ngaaka.

Ta gwedha po kutya aapindiki ya konda 150 otaya kutha ombinga miipindi yonuumvo. 

Moonkundathana nonzonkundaneki ndhika okwa ti, omauliko giipindi ngoka haga kala ko omumvo kehe.

“Aapindiki oya tegelelwa ya ulike iihongomwa, iilongomwa, oshowo Omahangano ga yooloka gopaumwene nogo papangelo taga gandja omayakulo,” ta ti ngaaka.

Mutikisha okwa ti, oya kwashilipaleka woo kutya egameno olya kalekwa po ethimbo lyiipindi onkene aakuthimbinga inaya pumbwa oku kala yena utile.

Ta ti, ohaya tala unene aanangeshefa ayehe, aashona naanene opo ya kuthe ombinga noku paathana omayele gopangeshefa.

“Omawuliko giipindi ompito ombwaanawa kaanangeshefa oshowo komahangano ga yooloka, okuulika uunongo niilonga oshowo okushingitha iilandandithomwa yawo,”ta fatula ngaaka.

Shitalangaho-Mutilisha okwa ti ota kumagidha oshigwana ashihe okuza kiitopolwa ayihe moshilongo oshowo kondje opo ya kuthe ombinga momauliko giipindi moka.

Kuuyelele wa gwedhwa po thika poombelewa dhelelo lyOndangwa. 

-vkaapanda@nepc.com.na