Minista gwomindhingoloko omatalelepo nomakuti Pohamba Shifeta okwa gwendhele omasiku gokuninga omayindilo guuthemba oku kala nomashina ngoka haga tewa niimaliwa momahala gokwiinyanyudha.
Pohamba momushanhwa gwa pitithwa mehuulilo shiwike okwa ti, omayindilo ngoka kwali ga tameke mo2021 okwali taga hulu momasiku 28 Febuluali nuumvo ihe paife oga gwedhelwa ga hule momasiku 31 Aguste nuumvo.
“Ota ti indile oshigwana opo shi longithe ompito ndyoka ya gwana okuninga omayindilo ngoka,” ta kumagidha ngaaka.
Aanangeshefa yomashina ya za kiitopolwa yilwe monooli okwa li ya gongala mOshakati omumvo gali okupulakena oshowo okugandja omayuuvo gawo kombinga yoveta yi na sha nomashina, ndyoka opo ya tulwa miilonga.
Shifeta okwa ti okatendo hoka okape Gaming and Entertainment Control Act, 2018 (Act No. 13 of 2018 ) oka li kayi miilonga okuza 01 lyaDecemba omvo gwayi.
“Okatendo haka otaka kwathela ooyene yomashina okulonga nuupu noke na uuwanawa owindji,” ta fatulula ngaaka. Ta ti, okwa li a kondjele oyene yomashina opo puye okatendo hoka take ya kalele po oshowo okuyagamena.
“Oyendji okwa li ye li ompinge nomashina opo ga hule po thiluthilu, oshoka otaga eta uupyakandhi moshigwana. Aantu yamwe oya kwatwa ko komashina unene,” ta popi ngaaka.
Tagwe po kutya shoka osho shili, aantu yamwe ohaya tula iiyemo yawo ayihe momashina.
“Oyendji kayu uvite ko elalakano lyokudhana omashina. Eshina oli na okudhanwa ashike ngeno okwi ikutha uuza, ihe haku tula mo iimaliwa ayihe,” ta popi ngaaka.
Phamba okwa li wo a fatulula kutya okatendo hoka taka longithwa paife otaka indile kehe gumwe a kale iinyolitha opo ku shiwike kutya omuna omashina gangapi moshilongo ga pewe oonomola oshowo okumona oolisinisa.
“Oshigwana okwali sha pewa ashike oomwedhi hamano opo kehe mwene gweshina a kale iishangitha, hoka kwali kwatameke mu Desemba omvo gwayi,” ta popi ngaaka.
Tagwedhapo kutya omashina agehe otaga ka tulwa uushina mboka tau kala tau kondotola eshina momikalo dha yooloka.
“Uushina mboka otawu ka kwathela okumona omashina uuna ga yakwapo, “ ta fatulula ngaaka.
Omupevi presidente gwongundu opo ya totwapo Naloba Peter Kanu Amadhila okwa li a popi ta ti, aanangeshefa oyendji oya nyenyeta kombinga yiifuto yomikanda dhomashina.
“Omashina ohaga futilwa N$25 000, iimaliwa mbyoka oyindji koonkondo shoka tashi tuundulile moondjo,” ta nyenyeta ngaaka.
Ta pula kutya oshiivule peni okukuthwa eshina naashoka taya na nanenwa moondjo.
Ta ti, aanangeshefa oya ti ngele epangelo olyi wete kutya aanangeshefa yomashina ohaya ningi oshimaliwa oshindji, epangelo na li landeko omashina ngoka lyo ta li kala ta li ga kondolola omanga ge li momahala gawo.