Auleria Wakudumo
Momukokomoko womwedi wa dja ko, ovakalimo vodoolopa yaNgwediva ova kala nomeva haa pate konyala efiku keshe.
Elelo lodoolopa ola holola kutya ola tameka okutunga etoolinga lomeva opo li xwepopaleke epato lomeva modoolopa.
Omupopiliko welelo lodoolopa yaNgwediva, Ottilie Shingenge okwa holola kutya elongululo letoolinga otali ka kwashilipaleka kutya omeva modoolopa itaa kala vali taa pataapata ngaashi a dja nokuninga omwedi wa dja ko.
“Ovatungi ova tameka nale okulongulula, okufitika nokuwapaleka etoolinga oshivike sha dja ko novateelelwa va kale va mana moule weemwedi nhee,” Shingenge ta ti.
Shingenge okwa ti elelodoolopa ola tula po oshimaliwa osho tashi ka longifwa shi fike peemiliona 5.3 opo oproyeka i dule okupwa.
“Mokukonaakona epato lomeva mOngwediva omwedi wa dja ko, nonghalo yetoolinga letu, elelo ola katuka onghatu opo li longulule etoolinga olo hali adjakanifa omeva komatoolinga makwao omeva koitukulwa aishe yodoolopa,” Shingenge ta ti.
Shingenge okwa ti omeva okwa li hama patululwa lumwe mefiku ngeenge omatoolinga a hada novakwashiwana ova li va pulwa va kale ve na omeva momandini nomomavela momaumbo opo va dule okulongifa pefimbo omeva a pata.
Shingenge okwa holola ta ti omatoolinga ohama mono omeva a wana, osho hashi eta opo a pwemo meendelelo nokuninga shidjuu okuwanifapo eemhumbwe dovakwashiwana.
Elelo lodoolopa yaNgwediva onghene tali twikile nokuyambula po odoolopa yalo mokuuya po neeproyeka da yooloka odo tadi lalakanene okuhanga eemhumbwe dovakwashiwana.
Natango, elelo ola shiivifa kutya otali ka kufa ovakalimo vomolukanda Onawa nOkandjengedi momilema mokutunga omalamba olusheno medoolopa edi.
Oproyeka oyo tai kosho N$800 368 oya tameka nale oshivike sha dja ko noya teelelwa i kale ya pwa moule weemwedi nhatu.